DAÎŞ’î Kobanê de Ramazan, polîsî zî Amed de Recep kişt

Keyeyê Hantaşî ra yo ke wextê qetlîamê Licê de keyeyê înan ame veşnayene û mecbûr mendî ke bar bikerê Ramazan Hantaş serra 2014 de, dorgirewtişê DAÎŞ’î yê Kobanê de, Recep zî Amed de bi guleyanê polîsan cuya xo kerde vînî.

Recep Hantaşo 20 serre yo ke bi arêdayîşê kaxidan debara xo kerdêne roja Yewşemeyî saet 03.02 de gama ke embazê xo dir Sumerparkê Amedî de roniştêne bi guleyanê polîsan ame kiştene. Walîtîya Amedî eşkerayîyêk derheqê nê kiştişî de da û vat ke polîsan vato ‘vindere’ embazê ê yo bi nameyê R.Y. teslîm bîyo labelê o remayo û hetê polîsan ra ‘bêtesîr’ ameyo verdayene.

La embazê Recepî R.Y. yo ke gama qewimîyayîşî de verê ê de bi vat, “Nêşkave ra vengê sîlehan ame. Recepî zî tayê panîk kerd û vazda, a game de ame pirodayene.” Bi nê hawayî îdîayê walîtîye pûç vetî.

Dîmenê ke kewtê dosyaya polis K.B. yo ke güle nayo Recepî ra zî ramojnenê ke îdîayê Walîtîye zûr ê.

Keyeyê Hantaşî yo ke wazeno kiştiş bêro zelalkerdene û kiştoxê ci bêrê cezakerdene muracatê Komeleya Heqanê Merdiman (ÎHD) kerd û Dozgerîya Komare de pêhesnayîşê sûcî kerd.

Keyeyê Hantaşî yo ke şînê Recepî ronayo serranê 90’an ra rastê zextanê dewlete ameyo. Keye heta serra 1994 dewa xo ya Babitnê (Kutlukoy) ya Licê de mendo. Serra 1994 de hetê hêzanê dewelete ra erzîyeno serê dewe. Dewe de 6 kesî yenê kiştene, 107 kesî zî yenê birîndarkerdene. Naye ser keyeyê Hantaşî zî sey xeylî keyeyanê bînan mecbûr maneno ke bar bikero şiro merkezê Amedî.

Dimayo ke serra 2014’î de lajê înan Ramazan seba şerê hemverê DAÎŞ’î tewrê refanê YPG’yî beno zextê dewlete yê serê keyeyî hîna benê vêşî. Keyeyo ke mehlaya Fatîhî yê Baglarî de yo tim erzîyeno ser, domananê keyeyî ra Mûrat Hantaş dimayo ke 1,5 serre bi îdîaya ‘hetkarîya organîzasyonî’ zîndan de maneno dewa ra beraat keno û yeno veradayene.

Birayê ci Mehmet Şah Hantaşî ard ziwan ke birayê ê Recepî kare xurdaroşîye kerdêne û Semtê Şehîtlîkî de dikanê ci estbi. Hantaşî vat dimayê kişîyayîşê birayê ê ra tayê kesan şîyo kilîdê dikanî şikitê û zere ra çi berdo ê nêzanê. Hantaşî heman wextî de vat bi motora ke birayê ci seba arêdayîşê kaxidan şuxulnayêne se bîyo hewna nêzanê.

Birayê ci yo bîn Efe Hantaş zî bawer keno ke no “înfazêko bêmuhakeme” yo. Hantaşî laj û pîyo ke seba ke vatibi “ma Kurd ê” rastê hêrişî ameybî ardî vîrî û vat, “Eke birayê mi Kurd nêbîyêne, do ewro biciwîyayêne.” Dedê ci Yahya Hantaşî zî vat cayo ke birazayê ci ameyo kiştene de kamerayê mobeseyî estê, her çî werte de yo û vat, “Eke ma huqûqê zereyî de netîceyêk nêgêrê ma do muracatê Mehkemeya Heqanê Merdiman a Ewropa (MHME) bikerê.”