Çeteyanê DAÎŞ’î vizêr bişewe herêma Şêx Bawe ya serê bajarekê Gulale ya qezaya Xaneqînî ya Dîyale de hêrişê leşkeranê artêşa Iraqî û sivîlan kerd.

Goreyê hayîdarîyan sere rayîrê serekeyî yê mabênê qezaya Kelar û Gulale de mayînêk ke verî amîbî bicakerdene otomobîlêk de teqîyaye, la bi çewî çîyêk nêbi. Naye ser sivîl û leşkeranê artêşa Iraqî verê xo da cayê qewimîyayîşî.

A game de çeteyanê DAÎŞ’î hêriş kerd. Netîceyê hêrişî de 2 sivîlî û 2 leşkerê artêşa Iraqî birîndar bîyî. Birîndarî ameyî berdene bi nêweşxaneyê pêroyî yê Kelarî.