Merkezê Cigêrayîşanê Dêrsimî (DAM) derheqê şawatanê birran de raporêk amade kerd. Raporo ke ameyo amadekerdene banê DAM’î yê Beyogluyî de bi kombîyayîşê çapemenîye rayapêroyî reyde ame parekerdene. Endamê DAM’î Huseyîn Ayrilmaz, Selman Yeşîlgoz, Muzaffer Kocaman, Nesîmî Adayî  tewrê kombîyayîşî bîyî. 

Metnê çapemenîye hetê Selman Yeşîlgozî ra ame wendene. Yeşîlgozî ard ziwan ke,  Dêrsim de şewatê birran bi bihaneyê  asayîşî bi zanayîşî yenê vetene û seba ke destê şarî ra çîyêk nêno mecbûr maneno nê şewatanê birran bêçare temaşe keno û vat, “Heme gandarî xozayî de wayîrê heqanê têduştan ê. Ne heqa dewlete ne kî heqa îdarekerdoxanê herême esto ke nê dejan bi şarê ma bidê ciwîyayene. Ma pawenê ke rêz bimojenê bawerî û rûmetanê şarê ma.”

Raporî de ame vatene ke, serra 2017 de sere de Merkezê Dêrsimî de, qezayanê ci Pilemûrîye, Xozat, Çemişgezek, Qisle, Pulur de 15 reyî şewatê birran vejîyayê. Serra 2018 de zî reyna Merkezê Dêrsimî de û qezayanê ci de 11 reyî şewatê birran vejîyayê.