Ame zanayene ke Zîndanê Xarpêtî yê bi Asayîşê Berzî yê Hûmara 2’ine de di rojî cuwa ver gardîyanan hêrişê 15 tepişteyan kerd. Tepişteyê ke birîndar bîyî înan ra Medenî Kîyeyî şûûrê xo vînî kerd, la rixmê naye nêame berdene bi nêwaşxane.

Birayê Mûstafa Geylanî yo ke Zîndanê Xarpêtî de yo Fahîr Geylanî da zanayene ke ê derheqê mudirê zîndanî û gardîyanan de Serdozgerîya Komare ya Xarpêtî de pêhesnayîşê sucî kerd. Geylanî bale ante rewşa birayê xo ser û vat eke çîyêk bêro serê birayê mi berpirsîyarê naye îdareyê zîndanî yo.