Cîhan Arano ke Ewropa de ciwîyeno, vat hetê kesanê ke xo sey teşkîlatê îstîxbaratê Munzurî ra dayo naskerdene ra bi keye û cinîya xo Semra Arane ameyo tehdîtkerdene. Keyeyê Aranî, hemverê tehdîtan de Dozgerîya Komare ya Dêrsimî rê muracatê pêhesnayîşê sûcî kerd.

 ÎHD: Dewlete Mesuldar a

Keye, dimayê pêhesnayîşê sûcî ra muracatê Şûbeyê Komeleya Heqanê Merdiman (ÎHD) kerd û eşkerayîya çapemenîye daye. Serekê Şûbeyê ÎHD’yî yê Dêrsimî Gurbuz Solmazo ke eşkerayîye de qisey kerd vat keye hetê kesanê ke xo sey hêzê dewlete ramotê ra ameyo tehdîtkerdene û ganî nê tavilî bêrê vetene bi mehkema. Solmazî ard ziwan ke asayîşê ganî yê keyeyî çino, çîyêko tewr qijkek bêro sereyê keyeyî mesuldarê ci dewlet a.

 Polîsî Yenê Keye

Cinîya Cîhan Aranî Semra Arane zî vat ke o nika tîya nêyo, labelê polîsî çende reyî ameyê keye û persê mêrdeyê ci kerdo, rixmo ke aye vato o tîya nêyo zî polîsî hewna zî yenê keye şinê.

 ‘Ma bi Nameyê Dewlete Kenê’

Arane çîyê ke ameyê aye sere wina qal kerdî: „Bi rayîrê medyaya sosyale, serê bedenê mi ra peyamê heqaretî şirawîyenê. Bi nenganê ke kes nêeşkeno vajo ma tehdît kenê, hemverê keyeyê ma de her tewir heqaret yeno kerdene. Seke no zî bes nêbo gama ke ez şina park, govend ûsn. yena şopnayene. Na yewe ra ez zaf tersena. Ez bi tena sereyê xo nêeşkena keye ra vejî. Kes yanê zî kesê ke behsê înan yeno kerdene vanê ke ê bi nameyê teşkîlatê îstîxbaratî yê Munzurî, MÎT û bi nameyê polîsî wina kenê. Eke çîyêk ame mi sere mesuldarê ci nê yê. Mi dozgerîye rê pêhesnayîşê sûcî kerd. Ez wazena çîyo ke ganî bêro kerdene wa bêro kerdene.“

 Maya Cîhan Aranî Guzcan Arane zî vat asayîşê ganê înan çino, waşt ke tedbîrê ke lazim ê bêrê girewtene.