Dêrsim de Merkezê Pêrîyî yê Komeleyanê Elewîyan ê Demokratîkan (DAD) bi şîarê ''Ocaxê rê îqrar, Rayîr rê Talîb,  Yewîye rê Dawet''î kombîyayîşê Pîran û Anayan ê di rojan organîze kerd. Kombîyayîşo ke vizêr ame destpêkerdene û Heyatê Şaredarîya Dêrsimî de yeno kerdene her hetê Tirkîya ra pîr ana, talîp, nuştoxê elewîyê kurd û tirkmenî û temsîlkarê partî û rêxistinanê sîvîlan ê bajarî tewrê ci bîyî.

Kombîyayîş de Rêya Heq, elewîtîye,xebatê ocaxan, meseleya yewîye, nasnameyê komelkîyî û xeylêk meseleyê bînî ameyî qiseykerdene. Verê kombîyayîşî  pîran û anayan gulbengî wendî, riza girewt û çira tafînayî. Dima ra rojnameger-nuştox Zeynel Kete qiseykerdişê akerdişî kerd. Keteyî ke kirmanckî qisey kerd vat ê bi ziwanê xo yê dayîke îqrar danê talîp, pîr û murşîtanê xo. Keteyî vat: ''Bi hezaran serran o ke bawerî û kulturê elewîtîye bi ziwanê xo yê dayîke o aver beno. Ma cemanê xo ziwanê xo de kenê. Ziwanê ma estbîyayîşê ma yo. Coka ganî ma wayîrê ci vejîyê.''

Hemserekê Pêroyî yê DADî Musa Kuluyî zî vat: ''Di bingeyê elewîtîye estê. Yew riza, o bîn îqrar o. Ma komelê riza yê. Ma bi aşme û tîje îqrarinê.  Elewîyî her çî ra riza genê û nêverdenê kiştox û dizdî bêrê cemxanayanê înan. La her ziwano ke heq û heqîqetî vano, ê ma yo. Dinya de  zaf ziwanê cîyayî estê. Her kes qala xo keno û sey merdimîya xo ver bi heqî şino.  Kam ke rayîrê xo vîn bikero,  heqî zî vînî keno. Kam ke xo mezano, heqî zî nêzano.''

Ana Fîdane Yildiza ke bi nameyê Ocaxê Baba Masurî qisey kerd vat:  ''Pîran tim xo aver berd la  cinîyî, ma yew kişte de verdayî. Ma vat rê vat 'şima werd pojenê' la ma pîrî uca nişnayê ro. Eke ma qala seyciyîye kenê ganî ma verê êyê ke kişta ma de seyciye vînê. Pîrê ma têna yenê keyeyanê ma. Anayî tewrê înan nînê. Ganî ma qiymetê anayanê xo bizanê.''