Dewa Gozluçayirî ya qezaya Çemizşgezekî ya Dêrsimî de erazîyê bi 10 doniman dîya şîrketêka madenî. 

Dima ke dewijan eşnawit dewanê Çemişgezekî de cigêrayîşê madenî do bêro kerdene rayîrî girewtî û nêverda ke wesayîtî debikewê dewan.

Muxtarê dewe Serdar Yildizî da zanayene ke eke şîrkete debikewa dewe hînî ê nêeşkenê debarê xo bikerê. Yildizî vat: ''Ma tîya de madenan nêwazenê. Eke tîya de madenî abibê ma gês verî ra mirenê. Ma tîya de heywananê xo kenê weye.''

Federasyonê Komeleyanê Dêrsimî (DEDEF) zî derheqê mesele de eşkerayîyêke daye û vat: ''Ma rayîr nêdê ke nê şîrketî xoza, ware, gelî û xozaya ma bêrê talankerdene. Ma nêverdê ke dişmenê xoza erdê ma çin bikerê. Destê xo medê Dêrsim.''