Gerîlayê HPGyî Cîhan Kit (Mahîr Munzur) 2018 de Dêrsim de pêkewtişê vera artêşa tirke ya îşxalkere de şehîd bibi. Fermandarîya Pêroyî ya Cendirmeyan vera keyeyê Kitî dewaya tazmînatî akerde. Fermandarîya dewa de waşt ke seba ke operasyon de leşkerê tirkî kerrayanê kendalî ra birîndar bîyê û tazmînat dîyayo înan 'ganî pereyê tazmînatî keyeyê Kitî bido.'  Fermandarîye dewa de keyeyî ra 15 hezar û 749,67 lîra pê faîzê ci wazena. 

Dadîya Cîhan Kitî Ferîde Kit derheqê babete de Ajansê Mezopotamya rê qisey kerd. 

Ferîde Kita ke newe zîndanî ra vejîyaya, da zanayene ke a zîndan de musaya ke vera ci dewa ameya akerdene. Ferîde Kit vat: ''Zîndan de mi rê ewraq ame. Ewraq de ameyêne vatene ke seba ke operasyon de kerrayî ginayê lingê leşkeran ma rê dewaya tazmînatî ameya akerdene. Sey ma keyeyê bînî est ê ke nînan ra pere wazîyeno. Ganî dişmen zî bibo çew yewbineyk rûmetên beno. Ganî çew yew dadîye rê wina zulmî nêkero. Dewlete ne mi ne zî esteyanê lajê mi rehet verdena. 

Ti hem lajê mi kişenî, hem zî mi rê pere wazenî. Dinya de naye ra pîlêr yew dej çin o. Vera ez yena destbendkerdene û mi rê dewa yena akerdene. Ez na hişmendîye şermezar kena. Ez bi lajê xo zereberz a. Ez do vera na hişmendîya dişmenî muracatê rayîranê huqûqîyan bikera. 5 serrî yo leşkerî erzenê keyeyê mi ser, domanê mi erzîyenê zîndanan. Ez zî tepişîya û rîyê îfadeyanê îtîrafkerêkî bîlasebeb zîndan de menda.''