Cemîle Anlaşa ke kênaya ci Aytene Anlaş Zîndanê Bakirkoyî de tepişîyena îfade kerd ke 10 serrî yo a kênaya xo têna 2 reyî dîye û waşt ke kênaya ci zîndanêkê nêzdîyêrî rê bêra sewqkerdene.
Aytene Anlaş 2012 de Îstanbul de tepişîyaye û cezaya zîndanî ya 21 serran dîyaye ci. Aytene Anlaş Zîndanê Bakirkoyî de tepişîyena.
Dadîya Aytene Cemîle Anlaşa 90 serre qezaya Pêrtagî ya Dêrsimî de ciwîyena. Dayîke Cemîle 10 serran de têna di reyî eşkeye kênaya xo bivîna. Aytene Anlaş seba ke sewqê Zîndanê Xarpêtî biba 4 waştişnameyî dayî la waştişnameyî ameyî redkerdene.
Aytene seba ke waştişê ci qebul bibı Wekîlê HDPyî Omer Faruk Gergerlîogluyî ra hetkarîye waşte. Gergerlîogluyî derheqê babete de yew waştişname da Serekîya Komîsyonê Cigêrayîşî û persnameyêk zî da Wezîrê Edaletî Bekîr Bozdagî.
Waka Aytene Întîzare Anlaş waya ci seba ke dadîya înan nêweş û kokim a sewqê xo waşt. Întîzara Anlaş vat: ''Dadîya mi 10 serran de 2 reyî waya mi dîye. Tewr peyên 6 serrî verî dadîya mi a dîye. Dadîya mi nêweş a û nêeşkena şora pêvînayîşî. Destûr nêdîyeno ke waya mi pêvînayîşê akerdeyî de bi rehetî têbigêra, derheqê ci de teqhîqatê dîsîplînî esto. No metodê teda yo.''
Dayîke Cemîle Anlaş zî waşt ke kênaya ci nêzdîyê zîndanêkê nêzdîyêrî biba û vat: ''Wa bêra nêzdîye. Çend serrî yo mi rîyê ci nêdî. Beno ke ez aye bivîna nêşinasnena. Hêvî kena ke kênaya mi yena nêzdîyê mi.''
