Dewa Azîzan a Kanîreşî de mîyanê mengêk de 20 kesî hetê geneyan ra ameyî gazkerdene, 2 kesî tedawî vînenê. Dewijê ke nêeşkenê heywananê xo berê mergan, awe bide bax û baxçeyanê xo selahîyetdaran ra wazenê ke tedbîrî bêrê girewtene.
Dewa Azîzan a qezaya Kanîreşî ya Çewlîgî de nizdê mengêk o Adirê Goninî yê Kirim Kongoyî (AGKK) de xeylî zêdebîyayîşêk esto.
Dewa ke 300 keyeyî tede estê 1 menge de 20 kesî hetê geneyan ra ameyî gazkerdene. 20 kesî ameyî berdene bi Nêweşxaneyê Dewlete yê Çewlîgî, dimayê mudaxeleyê ewilênî ra înan ra 4 kesî ameyî berdene bi Nêweşxaneyê Unîversîteya Dîcle ya Amedî. Nînan ra zî 2 kesî tabûrcî bîyî, Rojîn Ceba (17) û Ahmet Kaldiko (22) ke halê înan ê weşîye krîtîk o tedawîya înan Amed de dewam kena. Zêdebîyayîşê qewimîyayîşanê geneyan dewe de beno sebebê qesawetî, dewijî vanê ke ê nêeşkenê heywananê xo berê mergan û nêeşkenê awe bide bax û baxçeyanê xo.
Halîm Beko ke dewe ra yo vat ê binê hêrişê geneyan de yê û vat: “Nê geneyê heywanan nêyê, geneyê jehrin ê. Xusûsen xo dûseneno wucûdê merdiman ra û jehr keno. Ma verî çîyêko winayên nêdîbi. Ma nêzanê nê geneyî ça ra û senî ameyê. Tersê geneyan ra 1 menge yo ma nêeşkenê awe bidê bostananê xo. Ma nêeşkenê heywananê xo vejê mergan.”
