Wekîlê DEPî Mehmet Sîncar Êlih de 4ê êlula 1993î de amebi qetilkerdene. Roniştişê dewaya qirkerdişî Amed de ame kerdene. Roniştişî ra verî eşkerayîye ameye dayene. Merdimê Sîncarî, Vervatoxa HDPyî Ebur Gunay, Serekê Baroyê Amedî Nahît Eren, avûkatê OHD û ÎHDyî zî tewrê eşkerayîye bîyî.

Nahît Erenî îfade kerd ke rixmê hende delîlan zî waştişê heyetê pawitişî ameyî redkerdene û dosya ser o polîtîkaya bêcezaverdayîşî yena caardene. Erenî da zanayene ke ê do teqîbê dewa ra fek vera nêdê.

Cinîya Mehmet Sîncarî Cîhane Sîncar pare kerd ke ê do têkoşînê xo yê seba edaletî rê tim dewam bikerê. Cîhane Sîncar seba ke ê nêameyî girewtene salona roniştişî ûvera polîtîkaya bêcezaverdayîşî nêrazîbîyayîşê xo mojna û vat: ''Kiştoxî bi rehetî gêrenê.''

Hemserekê ÎHDyî yê Amedî Abdullah Zeytunî zî nêrazîbîyayîşê xo mojna û vat: ''Waştişê ma rixmê hende delîlan zî ameyî redkerdene. No zî mojneno ke vera na dewa polîtîkaya bêcezaverdayîşî dewam kena.''

Vervatoxa HDPyî Ebru Gunay dîyar kerd ke mehkeme ê nêgirewtî salone û xîret kerd ke rojnamegeran zî asteng bikera. Gunaye îfade kerd ke cara dewlete nêwazena nê qirkerdişî roşnî bikera.  Gunaye vat: ''Na dewa hînî milê Meclîsî de ya. Çunke Sîncar yew wekîl bi. Ma venga Meclîsî danê ke wa pêro faîlanê meçhulan roşnî bikero.''

Hetê bînî ra roniştişê dewa taloqê 27ê hezîrane ame kerdene.