Qezaya Şirnexî ya Silopî de, 4'ê Gulan a 2017'î de şoforê wesayîtê zirxinî yê panzerêk Omer Yegît kewtibi keyeyê Muhammed (7) û Fûrkan Yildirimî (6) her di birayî merdîbî. Dewaya Panzere ya şofor Omer Yegît û amirê ci Mûrat Madenî rojanê ravêrteyan de Mehkemeya Cizîre ya Cezaya Girane ya 2'ine de amî dîyene.

Derheqê şoforê panzere Omer Yegîtî de 19 hezarî cezaya pereyan amîbî dayene. Amirê ci Mûrat Madeno ke bi heman sûcdarîye ameyêne sûcdarkerdene zî amebi veradayene. Derheqê mudurê Asayîşê  Qeza yê dewrî Selçûk Erdoganî de zî bi sûcdarîya 'wezîfeyî bi xirabî şuxulnayîşî' pêhesnayîşê sûcî amebi kerdene.

'Arizaya Teknîke!'

Mehkema vat ke versûc Yegît wayîrê dokumentê ramitişî yê sinifa B'yî yo, eşkeno panzere biremno, labelê perwerdeyê ramitişê wesayîtanê zirxinan tam nêgirewto û sertîfîkaya ci çina.

Mehkeme, qerar da ke seba ke versûcî verê qewimîyayîşî qasê 6 mengî panzere remnaya derheqê ramitişê wesayîtanê zirxinan de tecrubeyê êyo bes esto. Qerar de ame vatene ke "(...) Hetê teknîkî ra kemîbîyayîşê wesayîtî û reyêk de stopkerdişê ci qeza de bitesîr bîyê, no xusûs kemasîya wesayîtî ra peyda bîyo, naye ra eşkeno sey arizayêka teknîke bêro qebûlkerdene."

'Nêzanayêne ke Sertîfîkaya Ci Çina'

Mehkeme, seba versûcê bînî Madenî zî vat ke hewteyêk verê qewimîyayîşê meseleyî ameyo cayê gureyî û mumkun nêbîyo ke personelanê ke binê mesuldarîya ê de yê nas bikero. Mehkema vat şahidan ra amirê polîsan Tûncay Taşdemîrî zanayo ke Omer bêsertîfîka yo, labelê amir Madenî nêzanayo.