20ê temmuza 2015î de qezaya Pirsûsî ya Riha de DAÎŞî vera ciwananê şorişgêran hêrişê bi bomba kerdbi û 33 ciwanî ameybî qirkerdene. Roniştişo 16. yê dewa Mehkemeya Cezaya Girane ya Riha de ame kerdene.

Avûkatî Sezîn Uçar, Serdil Îzol, avûkatê baroyanê Riha û Îzmîr û Wekîlê HDPyî yê Riha Omer Ocalan zî tewrê mehkeme bîyî. Vergumano tepişte Yakup Şahîn bi rayîrê SEGBÎSî tewrê mehkeme bi.

Heyetê neweyî yê mehkeme derheqê vergumanê verênî Abdullah Omer Aslanî de bira bêteqîbîye daye.

Bi waştişê avûkatan waştişnameyê veradîyayîşî yê cinîya Aslanî T.A. zî îlaweyê dosyaya dewa bi. Waştişname de T.A. ana ziwan ke Abdullah Omer Aslan sempatîzanê DAÎŞî bi.

Avûkatan Serdil Îzolî û Sezîne Uçar bira mehkeme rê îtîraz kerd û waşt ke îfadeyê Aslanî bêro girewtene. Avûkate Sezîne Uçar waşt ke serekwezîrê ê çaxî Ahmet Davutoglu wa bêro goştarîkerdene.

Mehkeme waştişê avûkatan red kerdî û waşt ke Yakup Şahîn wa bêro goştarîkerdene. Roniştiş taloqê 9ê sibata 2021î ame kerdene.