Dewijanê dewa Darê ya qezaya Çinarî ya Amedî vera ocaxê xizî yo ke heywanan kişeno û goranê dewijan texrîb keno verê edlîye de çalakîye kerde. Dewijan vat: Hînî wa vengê ma bêro eşnawitene. Bi serran o ma nê zulmî ancenê la kesêk vengê ma nêeşnaweno.
Dewijanê Darê ya Çinarî verê edlîye de vera ocaxê xizî çalakîyêke kerde. Verê cû zî ocaxê xizî yo ke gorê dewijan texrîb kerdbi bibê sebebê nêrazîbîyayîşan.
Ocaxê xizî nika zî rayîranê dewan û cayê heywanan texrîb keno. Dewe de çalê pîlî yenê akerdene ke heywanî kewenê ci û mirenê. Dewijan verê cû seba ke ocax berô padayene verê ocaxî de xeymî ronabi la leşkeran xeymî wedaritbi û dormeyê dewe girewte. Dewe de destûr nêno dayene ke domanî şorê dibistane û dewe bi droneyan yena taqîbkerdene.
Çalakîya vera ocaxê xizî yê verê edlîye de cinîyan rayberîye kerde. Çalakîye de sloganê ''No edalet nîyo'', ''Waştişê ma heqdar o'', ''Ocaxê xizî wa çin bibê'' ameyî vatene.
Dewije Selma Arslan vat: "Gorê ma texrîb kerdî. Domanê ma nêeşkenê şorê dibistanan, leşkerî înan tehdît kenê. Hînî wa vengê ma bêro eşnawitene. Bi serran o ma nê zulmî ancenê la kesêk vengê ma nêeşnaweno.
Hewê Tana 65 serre û Fatma Arslan vat: "Nêzdî de dewa ma do vîn biba. Ma nêeşkenê goranê xo bivînê. Ganî selahîyetdarî çareyêke bivînê. No hînî heta keyî dewam biko?"
Dewijan îfade kerd ke ê do bi rayîrê avûkatanê xo muracatê Serdozgerîya Komare ya Amedî bikerê.
