Xozaya Kurdîstanî hetê dewleta tirke ya îşxalkere ra yena talankerdene. Dewleta tirke koyanê Kurdîstanî dana bombayan ver û cayo ke îşxal kena tede daran birnena. Bi taybetî Vakurê Kurdîstanî de bi destê serqoricî Şêhmus Babatî bi des tonan darî birîyenê. Çarçewa polîtîkayanê îşxalî de Cûdî, Zap, Avaşîn û Metîna de qoricîyî û hêzê dewlete  daran birnenê û vêşnenê. Seba viraştişê qereqolan zî bi hemkarîya PDKyî rayîrî virazîyenê.

Qasê 2 serrî yo Cûdî û Besta de bêmabên darî birîyenê. Hem hetê madî ra hem zî hetê manewî ra zerarêko pîl dîyeno xozaya Kurdîstanî. Cergê bajarekanê Sêgirkê û Hîlalê Qilaban, Besta û Tîkera de bi yewmîyeya 150-200 lîra xebitîyenê. Besta de zî qoricîyî Mahmut Babat, Kazim Babat û Suleyman Babat seba ke dewijî tewrê qirkerdişê xoza bibê înan rê teda kenê.

Wina vajîyeno ke herêma Tîkêra de roje de 300 ton darî birîyenê û erşawîyenê warê nêzdîyê Sêgirkê.  Darî dima hetê Mahmut Babat, Kazim Babat û Suleyman Babatî ra roşîyenê. Pê destê qoricîyan herêmanê Besta, Gabar, Cûdî de û dewanê Girê Sor, Xêrga Girê Guzgê, Tenûra , Girê Gêsin, Çalpîjîna, Baskê Qulinga, Mêrgumar, Kaniya Mîr, Bîratetûm, Bîrapêşû, Cinîwer, Berûzer, Rîsor, Naviyan, Çiyayê Cudî, Benavya, Girê Sîvê, Pişta Reşa, Çemê Mezin û Kurta Xanî de bi hezaran darî birîyenê. Darî dewanê Rîsor û Navîyanê de arê dîyenê û pê kamyon û tiran erşawîyenê şaristananê bînan.

Başûr de zî herêma Berwarî de pê destê PDKyî darî birîyenê. Goreyê Rojnewsî dewleta tirke nêzdîyê dewa Hirorî de baregehê leşkerî virazena. Seba rayîrê baregehî zî verê yewinanê hêzanê PDKyî de darî birîyenê. Xebere de yeno vatene ke baregeho leşkerî pê hetkarîya Fermandarê Tugayê 1. yê Yewinanê Pawitişê Sînorî yê PDKyî Dilêr Ferzende Zêbarîyî virazîyeno. Goreyê çimeyêkê herêmî dewleta tirke dewanê Saxan û Şeşdaran a Zaxoyî de binê çimdarîya PDKyî de dest pê birnayîşê daran kerd.

Goreyê raporê Partîya Keskan a Kurdîstanî dewleta tirke herêma Behdînanî de 3 mîlyon darî birnayî. Serekê Heyetê Pawitişê Xoza yê Herêma Kurdîstanî Ebdulrehman Sidîqî bale ante hêrişanê qirkerdişî û texrîbatê xoza ser û îfade kerd ke bombardumananê dewleta tirke ra warê qasê 1 mîlyon donim zerar dîyo.

Wekîlê YNKyî Zikrî Zêbarîyî derheqê babete de ANFyî rê qisey kerd.

Zikrî Zêbarîyî dîyar kerd ke dewleta tirke hêrişê kamcayî bikera tede baregehan ronena û uca talan kena. Zêbarîyî vera bêvengîya hukmatê Kurdîstanî ya vera hêrişanê dewleta tirke nêrazîbîyayîşê xo mojna û vat: ''Meverdê xozaya Kurdîstanî wa bêra telankerdene. 2015 ra nata qasê 150 sivîlî axpîn û baxçeyanê xo de şehîd bîyî. 133 hemwelatîyê ma zî birîndar bîyî. 1800 donim erazî vêşa. Zerarê pîlî dîyayî Başûrî. Xeylêk merdiman erdê xo terikna.

Ganî Parlamentoyê Kurdîstanî û Hukmatê Kurdîstanî erk û mesuldarîyanê xo bîyarê ca. Wa bizanîyo ke nê hêrişî armanc kenê ke serdestîya Başûrî qels bikerê. Nê hêrişê îşxalî yê ke pê bahaneya PKKyî yenê kerdene, raşt nîyê. Dewleta tirke wazena Başûrî îşxal bikera. Dewleta tirke tewr zaf Avaşîn, Metîna û Garê de daran birnena. Dewleta tirke kamca îşxal bikera tede daran birnena û baregehê leşkerî nana ro. Tay darê ma zî seba bazirganîye şuxilnena.''