Goreyê xebera Rojnewsî dewleta tirke ya îşxalkere goreyê saeta herême 11.00 de pê teyarayanê şerî hêrişê Koyê Metîna kerd ke sînorê qezaya Duhokî ya Amêdîye de yo.

Rîyê bombardumanî ra herême de şewato gird vejîya. Dîya zanayene ke ekîbanê pawitişê sîvîlî yê Herêma Kurdîstanî semedê hewnkerdişê şewatî hema qet mudaxaleyêk nêkerdo.

Dewleta tirke ya îşxalkere rojanê peyênan de vera Koyê Metîna hêrişê xo zêdînayî. Dewanê herême de xeylêk leşker, çekê giranî û wesayîtê zirxinî ameyî cakerdene. Rîyê hêrişan  ra xeylêk dewî ameyî vengkerdene. Bexdad û Hewlêr zî vera îşxalkerîya tirke bêvengîya xo pawena.