Merkezê Çapemenî û Îrtîbatî yê HPG’yî ke eşkerayîyêka nuştekîye daye, vat dewleta Tirkî ya Îşxalkare bizanayîş hêrişê cayê sivîlan kerd. Mexmûr de 2 kesî birîndar bîyî.

Eşkerayîya HPG’yî wina ya: ‘’ 19’ê Temmuze de saet 00.10 artêşa Tirkî ya îşxalkare  bi teyarenê şerî hêrişê Kampa Şehîd Rûstem Cûdî ya Mexmûrî kerd. Netîceya hêrişî de 2 sîvîlî birîndar bîyî û baxçayanê şarî zirar dî. Nê hêrişkarano ke hêrişê  şaro ke vera hêrişê DAÎŞ’î vejîya û vernîya îşxalkerdişê Başûrê Kurdistanî girewt kerd ferqê înan  û zîhnîyetê DAÎŞ’î çîn o. Heta ke Neteweyê Yewbîyayeyî (NY), hukmatê Iraqî û hukmatê Herêma Kurdistanî vera nê hêrişî reaksîyon nêdê, ê do binê nê hêrişî de bimanê.  Sahaya hewayî ya Iraqî binê kontrolê dewleta Iraqî û hêzanê koalîsyonî ya û berpirsîyarîya  NY’yî ya pawitişê kampe esta.

No demo ke Mucadeleyê Azadîye yê Kurdistanî kewto merhaleyêko tarîxî, hêrişê koalîsyonê faşîstî yê AKP-MHP’yî yê vera şarê Kurdî zêdîyenê. Hêrişê vera Kampa Mexmûrî reyna rîyê înan o raşt ramojna. Bi hêrişê Mexmûrî yeno waştene ke îradeyê şarê Kurdî bêro şiknayene. Wa hetê her kesî ra bêro zanayene ke hesabê nê hêrişî do bêro persayene. Kesê ke nê hêrişî d birîndar bîyî, ma înan rê serweşîye wazenê.

18’ê Temmuze de teyareyanê şerî yê Tirkî hêrişê dewa Sîpîndare ya Dûhokî kerd. 2 wesayîtê dewijan ser o bombayî ameyî varnayene.  Netîceyê hêrişî de 3 sîvîlî birîndar bîyî. Cayê ke ameyî bombardûmankerdene de faalîyetê gerîlayanê ma çîn o. Artêşa Tirkî bizanayîş sîvîlî hedef girewtî. Bi nê hêrişan wazenê ke şarê Başûrî bitersnê û teslîm bigêrê. Kesê ke nê hêrişî de birîndar bîyî, ma înan rê serweşîye wazenê. Ma  reyna vanê ke, ma do nê zîhnîyetê faşîstî ra hesab bipersê.''