Komeleya Rojnamegeran a Dîcle-Firatî (DFG) bi paştdayîşê MED-DERî bi wesîleya 21ê Sibate Roja Ziwanê Dayîke ya Dinya atolyeyê rojnamegerîya bi kurdkî da destpêkerdene.

Atolye do hewteyêk dewam bikero û atolye de perwerdeyê kurdkî û nuştişê xeberan do bêrê dayene.

Hemserekê DFGyî Serdar Altanî pare kerd ke bi wesîleya 21ê Sibate înan bire daye ke atolyeyêkê winasênî bidê û vat: ''Astengîyê vera kurdkî ewro zî dewam kenê. Seba ke ziwan her ca de vila bibo û kurdkî biresa astêka başe, xebatê girîngî yenê kerdene. Ma waşt ke mîyanê nê xebatan de ca bigêrê. Atolye de perwerdeyê kurdkî û perwerdeyê rojnamegerîye pîya do bêrê dayene. ''

Mamostayê MED-DERî Murat Bîlgîçî zî ard ziwan ke rêxistinê rojnamegerîye dezgehê verênî yê perwerdeyê kurdan bîyî û vat: ''Rojnamegeran wezîfeyê perwerdekerdişê kurdkî girewt xo ser. Ewro seba ke dibistanê kurdan çin ê, rojnamegerî nê mîsyonî rê dewam kenê. Ez bawer a ke bi nê dersan no mîsyon do baş bêro caardene.''

Eşkerayîye ra dima roja verêne ya atolyeyî dest pêkerd.