Artêşa tirke ya îşxalkere 14ê nîsana 2022yî ra nata hêrişê Herêmanê Pawitişî yê Medya kena. Artêşa îşxalkere pê xoverdayîşê gerîlayan nêeşkaye û dest eşt bombaya nuklere ya taktîkî û çeka kîmyewîye.

Tewr peyêne tay dîmenî eşkera bibî ke dîmenan de aseno ke artêşa îşxalkere vera tunelanê şerî yê Şehîd Hêjarî yê Warê Xoverdayîşî yê Girê Hekarî bombaya nuklere û çeka kîmyewîye şuxilnena. Nê dîmenî 20ê tebaxe de hetê ANFyî ra weşanîyayî. Dîmenan de aseno ke leşkerê tirkî qabloyan bestenê pê û bombaya nuklere benê verê tunelan.

Dîmenê neweyî yê serê şuxilîyayîşê bombaya  nuklere eşkera bîyî. Dîmenan de aseno ke vera mewzîyanê şerî yê Girê Şehîd Zemanî yê Warê Xoverdayîşî yê Girê Hekarî bombaya nuklere şuxilîyena. Wexto ke bomba teqena tesîrê ci ra kameraya ke 5 kîlometre dûrî de ya zî lerzena. Artêşa îşxalkere na bomba zî verê tunelanê şerî de teqnaya. 

Goreyê doneyanê HPGyî û muxabîranê herême artêşa îşxalkere heta nika 1600 reyan ra zêdeyêr çekê kîmyewî yê qedexekerdeyî vera tunelanê şerî şuxilnayî. Bi taybetî Warê Xoverdayîşî yê Werxelê, Şikefta Birîndara, Çiyayê Reş, Kurojahro, Çemço, Saca, Girê Cûdî, Girê FM, Girê Hekkarî û Girê Amediyê hema hema her roje pê bombaya nuklere û çeka kîmyewîye dîyenê bombayan ver.

Bombaya nuklere ya taktîkî yan zî bi nameyê xo yê bînî çeka nuklere ya taktîkî çekê winasênî yê ke menzîlê înan kilm ê, seba endamanê NATOyî yenê berardene, tesîrê ci manenê tesîrê bombaya atomî û seba armancanê stratejîkan şuxilîyenê. Nê çekê 'nuklerî yê taktîkî' cebilxaneyanê Amerîka û welatanê NATOyî de est ê. Bombaya nuklere ya taktîkî ya tewr qije hetê artêşa tirke ra vera tunel, şikefte û noqtayanê vîyartişî de şuxilîyena ke tesîrê înan qasê bombayanê TNTyî yo.

Korgeneral-Pîlot Erdogan Karakuşo ke artêşa tirke ra teqawut bîyo, adara verêne de bernameyêkê televîzyonî de îtîraf kerdbi ke dewleta tirke çeka nuklere şuxilnena. Karakuşî vatbi: ''Çekê taktîkî yê nuklerî îlaweyê nînan (bomabayanê atomî) nêbenê. Çekê nuklerî yê taktîkî wextêk destê hêzanê ma de zî est bîyî. Yewinanê topeştoxan nê çekî şuxilnayêne. Taxrîbatê nê çekan çew bi xo eyar keno. Yanî bombayê ke erzîyayê Japonya 20 kîloton ê, nê zî nêm kîloton ê.''