Endamê Konseya Serekîya Pêroyîye ya KCK’yî Dîyar Xerîb (Helmet) û gerîlayî  Abdulkadîr Aslan (Şahîn  Dîcle ) û Mûrat Gunduz (Devran) ê ke 5’ê Temmuze de hêrişê dewleta Tirkî ya îşxalkare de şehîd bibî, vizêr Şehîdgehê Mehmet Karasûngûrî yê Qendîl de bi merasîmêkê biheybetî ameyî definkerdene.

Saetanê serê sibayî ra xeylî bajaranê Başûrê Kurdistanî ra bi hezaran kesî herêma Raperînî de ameyî pêser. Kîtleyo ke waştêne Kampa Mexmûrî ra tewrê merasîmî bibo, Hewlêr de PDK’yî vernîya ci girewt, destûr nêda.

Dimayo ke konveyê Raberînî resa Qendîl rayraşîyayîş dest pêkerd. Rayraşîyayîşî de fotograrê Rayberê Şarê Kurdî Abdullah Ocalan, endamê Konseya Serekîya Pêroyîye ya KCK’yî Dîyar Xerîb, Şehîd Dr. Şîrvan û Şehîd Vîyan Sorane  û bayreqê PKK û KCK’yî ameyî kiriştene û bi sloganan bêmergîya şehîdan ardîyaye ziwan û îşxal û xîyanet ameyî şermezarkerdene.

Rayraşîyayîşo ke cinîyan sefanê vernîye de ca girewt waya Xerîbî zî tewrê ci bîye. Dimayê rayraşîyayîşî Şehîdxane de rêz ame girewtene û marşê Ey Reqîbî ame wendene. Bado zî mesajê Komîteya Keyeyanê Şehîdan ê Başûrê Kurdistanî yê PKK’yî ame wendene. Mesaj de ame vatene ke hemra Helmet tim vera xîyanetî mucadele temsîl kerd. Seba şarî şorişgêro ke rayber bi.

Mesajê Hemserekîya Konseya Rayberdişî ya KCK’yî zî hetê rojnameger û nuştox Hesen Cudî ra ame wendene. KCK’yî vat: ‘’Me keyeyê hemra Helmetî, Rayber Apo û şarê xo rê serweşîye wazenê. Heta çilka peyêne ya gonîya xo ma do rêçê şehîdanê xo de rayra şirê û amancê înan biresnê serfirazîye. Dişmen wazeno ke destkewteyanê şarê Kurdî çîn bikero. Hêrişê vera hemra Helmetî bi hemkarîya hêzanê hemkaran ame viraştene. Têgêrayîşê ma têgêrayîşêkê qesasî yo. Ma do miheqeq qesasê hemra Helmetî bigêrê.’’

Endama Konseya Rayberdişî ya KCK’yî Besta Firate zî tewrê merasîmî bîye û qiseykerdişêk kerd. Firate vat: ’’Ma sondê qesasî wanenê. Hemra Helmet rayberê  şarê Başûrê Kurdistanî û netewa demokratîke bi. Wendekarêko xoverdayox ê Rayber Apoyî bi. Hemra Helmet sembolê neteweyîye yê çar perçeyanê Kurdistanî bi û hemeyê perçeyan de emegê ey esto. Şarê Başûrê Kurdistanî bi rojan o ke payra yo. Ma nê wayîrverjîyayîşê hemra Helmetî silam kenê, pîroz kenê. Çar perçeyanê Kurdistanî ra do Helmetî bivejîyê.’’

Merasîm bi mesajanê PKK, keyeyê Xerîbî, alîmanê dînî yê Başûrê Kurdistanî û Tevgera Azadî dewam kerd.