Hêzanê Xopawitişî yê Mexmûrî ra Ferhan Dîderî vist vîrî ke dewleta Tirkî ya ke hetê Erdoganî ra yena îdarekerdene heme destkewteyê Kurdan hedef girewtî û sere de PDK û pêşmergeyî heme Kurdan ra  waşt ke na raştîye bivînê û goreyê naye tê bigêrê.

Hêzanê Xopawitişî yê Mexmûrî ra Ferhan Dîderî derheqê hêrişê dewleta Tirkî yê vera Başûrê Kurdistanî de ANF’yî rê qisey kerd.

PKK Heme Kurdan Paweno

Ferhan Dîderî muhîmîya rolê gerîlayî vist vîrî û va: ‘’Gerîla hemeyê Kurdistanî paweno. Ma zana ke dewleta Tirkî ya ke hêrişê Xakurkê, Xinerê, Heftanîn, Metîna û Qendîlî kena bi naye qîym nêkena. PDK bi polîtîkaya xo paştî dana hêrişkaran û vernîya înan akeno. Îqtîdarê AKP-MHP’yî yo ke sîyasetê zere û teberî de tengayî anceno bi paştayîşê PDK’yî hêrişê Kurdistan keno ke xo rê ca abikero. Demo ravêrte de ma Kurdî xo mîyan de kewtî têmîyan, ma yewbînî kiştî û hemeyan naye ra zirar dî.bPKK, YNK û PDK naye ra zirar dî. Nika ma o wext de nêyî. Kurdî bedilyayî. Ganî hêzê Kurdan vînê ke Kurdan ser o senî kayî yenê kaykerdene, nînan rê mexapîye û nê polîtîkyanê vera Kurdan deşîfre bikerê.

Ganî Vera Îşxalê Dewleta Tirkî Bi Ruhê Şeladizê Sere Wedarîyo

Dîderî bale ante serê xoverdayîşê Şeladizê û va: ‘’Şarê Başûrê Kurdistanî ganî sey wextê Şeladizê vera hêrişanê îşxalkerdişî sere wedaro. Tirkî hem wezanê Kurdistan îşxal bikerê hem zî Kurdan biverdê yewbînan. PDK ganî çimanê xo abikero, na raştîye vîno û vera hêrişan bêveng nêmano. Îdareyê Başûrê Kurdistanî polîtîkaya xelete bica ano. Tirkîya PDK’yî şuxulnena, wazena ke kiştoxê wayûbirayî bikero. Bi PKK’yî qîym nêkenê. Heme destkewteyanê Kurdan hedef kenê. Seba ke Kurdî yew nêbê, çi ke destê înan ra yeno kenê. PDK nayî nêvînayîşî ra yena. Tarîx do rojêk ê ke Kurdan rê îxanet kenê înan ra hesab biperso. PDK’yî heme cayê xo yê Metîna dayî Tirkan.  Heta kincê xo zî dayî înan.  Naye teyna ma nê qet Kurdêk qebûl nêkeno. Ganî heme Kurdî hurzê lingan ser. No eşkerayo ke eke Kurdistan de PKK vînî bikero heme Kurdî vînî kenê. Hêzê PKK’yî ra PDK zî hêz gêno. No wîna yo. Dewleta Tirkî semedê heme Kurdan tehlukêyêko gird a.’’

Wa PDK Destê Xo Îxanetî Ra Bianco

Dîberî qiseykerdişê xo wîna qedîna: ‘’Rojakewtena Mîyanêne de Kurdî hêzo hîreyin ê. Kurdan DAÎŞ’î rê da vînîkerdene û dima ra weçînitiş de Erdogan rê da vînîkerdene.  Seba Kurdan hema tehlûke nêqedîyo. Coka ganî yewîya neteweyîye bîbo. Dişmen Kurdan cîya nêkeno hemeyan sey hedefî gêno.  Wextê Referandûmî de Erdogan û dewleta Tirkî seba îdareyê Başûr Kurdistanî çîyê ke vatî û heqeretê ke Barzanî rê kerdî werte de yê. Pêşmergeyî zî ganî naye xo vîra nêkerê û leteyêkê nê kayî nêbê. Dişmenî dir wertaxîye nêbena. Wa PKD destê xo îxanetî ra bianco.’’