Embaza têkoşînî ya Gulîstane Tara rojnamegere Stêrke Gulo ANFyî rê qalê Gulîstane kerd.

Stêrke Gulo da zanayene ke aye 2001 de Gulîstane Akademîya Çapemenîye ya Şehîde Gurbetellî Erdoz de şinasnaya û vat: ''Gulîstane bi perwerîya xo bala mi ante. Gulîstane Êlihî ra bîye. A şagîrtanê akademî yê jêhatan ra yewe bîye. Gulîstane kesêka winayêne bîya ke mîyanê her şert û mercî de karê xo war nêverdayêne. 23 serrî yo ez Gulîstane şinasnena. A hertim rêçê raştîye de şîye peynî de bi xo bîye raştîye.

A her parçeyê Kurdîstanî de zerrî ra xebitîyaye. Aye Başûrê Kurdîstanî de zî kedêka pîle daye. Başûr de a sorankî musaya. Aye govende û cigêrayîşî ra hes kerdêne. Waştêne ke çar parçeyanê Kurdîstanî de cinîyan ser o cigêrayîş bikera. Aye tim hetkarîya embazanê bînan kerdêne. Tarîxê çapemenîya azade de embaze Gulîstane bîya stunêkî. Gulîstane goş nêda zehmetîyan, rayraşîyayîşê xo rê dewam kerd. Gulîstane ê qehremananê Kurdîstanî ra yewe bîya ke bi qelema xo û kameraya xo bîye vengê şarê xo. 

Bi şehadetê aye hêrsê ma yê vera dişmenî zî zêdîya. Gulîstane karê rojnamegerîye kerdêne. Aye raştîyê polîtîkayanê înkar û îmha şarê ma reyde pare kerdêne. Şehadetê aye Rojawan de zî, Başûr de zî Vakur de zî veng vet. Ma hinî fam kerd ke Gulîstane hinî Gulîstana pêro Kurdîstanî ya.''

Rojnamegere Stêrke Gulo bale ante ser ke Gulîstane Tara bi hemkarîya PDKyî ameya qetilkerdene û vat: ''Dewleta tirke dewletêka winayên a ke çapemenîya azade ra tersena coka hêrişê rojnamegran kena. La nê hêrişî de dewleta tirke mutefîqanê xo yê herême reyde têgêraye. PDK bi hemkarê nê qirkerdişî û dima zî xîret kerd ke raştîyanê qirkerdişî binimna. 

Bi desan şagîrtî Rojawan de est ê ke embaze Gulîstane nê perwerde kerdbî. Nê şagîrtan soz da ke rayîrê Gulîstane ra şorê. Qirkerdişî do bi têkoşînê ma nêeşkê. No têkoşîn bi Gurbetellî dîyabi destpêkerdene û nika bi Gulîstane Tara û Hêro Bahadîn dewam keno. Ma do qetî peyê raştîyan nêverdê.''