Endamê Komîteya Merkezî ya PKK’yî Kasim Engînî îşxalkarîya dewleta Tirkî û mucadeleyê hemverê na îşxalkarîye ANF’yî rê ercna.

 Engînî ard ziwan ke çarenûsa Rojakewtena Mîyanêne xo sepernena xîlafê Tirk û Persan û vat, “Xîlafê mabênê Tûranan û yê Rojakewtena Mîyanêne tarîxî yo. Zaf zehmet o ke torinê Osmanîyî û torinê Safewîyî bêrê têhet. Yewbîyayîşêko bi nê hawayî zehmet o, labelê gama ke mesele Kurdî bê xeylî asan o ke bibê yew û hemverê Kurdan de polîtîkayêka hempare bewlî bikerê.”

Kasim Engînî ard ziwan eke dewleta Tirkî nika hêrişê Xakurkê û pêroyîya Kurdistanî kena û Iraq û Îran hemverê nê de vengê xo nêkenê na yewe rîyê dişmenîya înan a hemverê Kurdan ray a û vat, “Kurdî Rojakewtena Mîyanêne de benê hêzêko muhîm o polîtîk. Tersê înan no yo ke Kurdî zî sey înan bi nameyê Kurdistanê pîlî netewe-dewletêk awan bikerê. Qaşo hêzê rojawanijî zî paştî danê Kurdan, xusûsen DYA tewr zaf hetê Kurdan kena, seba ke nê tehlukeyî raste ra wedarê ê zî veng nêvejenê. Loma paştî danê TC’yî yan zî vengê xo nêkenê. Mesele no yo. Labelê wa ê bizanê ke antî Amerîkatîya înan veng a. antî kapîtalîstîya înan sey antî kapîtîlastîya Erdoganî ya; dînperwerî û Muslumanîya înan zî veng a.”

Kasim Engînî vat gama ke meşte DYA û Erdoganî problemê hal kerdî, a game do Iraq zî, Îran zî bivîno ke faşîstê antî Rojakewtena Mîyanêne yo bi nameyê Erdoganî kam o.

‘Bi Hemkarîya Kolonyalîstan Kurdî Bi Ser Nêkewenê’

Kasim Engînî bale ante serê tewir û nizdbîyayîşê hêzanê Kurdan ê hemverê nay ewe û vat, “Ma bîyarê vîrê xo; Rayber Apoyî 2013 de gama ke pêvînayîşan dewleta Tirkî dir dewam kerdêne bale antebî sere muhîmîya xebatanê Yewîya Neteweyîye. Seba hemserekîye zî Mesûd Barzanî û Leyla Zana pêşkêş kerdîbî. Ûca keyeyê Barzanî nêamebi qijfînayene, amebi sereberzkerdene. La înan xo nêda nizdê nê û firnsedêko tarîxî dest ra şi. Dima ra ma mûsayî ke înanê ke nêwaşt Birêz Mesûd Barzanî tewrê nê karê Yewîya Neteweyîye bibo şêwirmendê nizdîyê ê bîyê. Meseleyê Kerkûkî de zî înanê ke werte de verdayo zî heman hêz ê.

Bi kilmî şehadetê merdimo pîl, hemra şorişgêr Helmetî ramojneno ke bi hemkarîya kolonyalîstan Kurdî bi ser nêkewenê, heman wextî de keyeyê Barzanî zî pê ser nêkeweno. Ma na yewe Teşrînê Verênî yê 2017’î de bi hawayêkê eşkerayî dî. Ma dî ke Kerkûk senî destê Kurdan ra ame vetene, hende qezencî raste ra wedarîyayî. 2017 de înanê ke tewr zaf hêriş kerd Erdogan û dormeyê ci bîyî, oyo ke hêzê bînî teşwîq kerdî ke hêrişê Kurdan bikero Erdogan bi. Halêkê winayênî de tirêm manayêka ci esta ke pîya bi dewleta Tirkî, pîya bi Erdoganî tê bigêrê?

Eşkeno bêro vatene Erdogan hêzêk o, wazenê ê ra îstîfade bigêrê. Labelê weçîntişanê Stenbolî ramot ke Erdogan şîyayox o. Binkewtişê ê raste de yo. Labelê ganî bêro zanayene ke binkewtişê Stenbolî tena ê Erdoganî nêyo. Heman wextî de yê keyeyê Barzanî yo. Serdana Nêçirvan Barzanî ya rojêk di rojî verê weçînitişî seba serfirazîya Erdoganî bi. Eke Erdogan weçînitiş de bin kewto, a game keyeyê Barzanî zî bîn kewto.“

'Hemverê Bêvengîya Başûrî Ganî Şarê Ma Xo Bipawo‘

Kasim Engînî persa ‚Mîyanê rastîyêka winayêne de şima çira xeta binkewtî de israr kenê?‘ kerde û vat, „Tirêm rast nêyo ke ganî herinda binkewtişî de ma bi nameyê şarî bi ser bikewê? Nika herêma Behdînan ê Baiûrî de bi desan baregehê leşkerî yê TC’yî estê. Tirêm organîzebîyayîşêko bi nê hawayî eşkeno vengê xo hemverê îşxalbîyayîşê Xakurkê de, îşxalbîyayîşê Kurdistanî de bikero?

Bi kilmî nika tena yew çî esto ke ganî Başûrê Kurdistanî de bêro kerdene. O zî no yo ke şarê ma hemverê na bêvengî û teslîmîyetî bi hawayêkê topyekunî heqê xo yê pawitişê meşrûyî bişuxulno. Henry David Thoreauyo ke pênaseyê ‚bêîtîatîya sivîle‘ aferna, vano, Hurmetê seba hukmatêk ke edaletî nêaferno rast nêyo.‘ Heman wextî de vano, ‚Wezîfeyê merdiman o yo ke hemverê nêheqîya dewlete de vinderê.‘ A game çîyê ke ma sey şaro Kurd eşkenê bikerê wina yê:

- Bi xebatanê yewîya neteweyîye hemverê tewirê perçebîyayeyî de vinderê.

- Eke hêzê kolonyalî benê yew û serê şarê Kurdî û têgêrayîşanê Kurdan de yenê, a game ganî hemverê nê nizdbîyayîşî yo ke yeno manaya hemkarîye tewir bêro ramotene.

- Ganî ma hêzê xo bikerê yew û seba ke îşxalkaran welatê xo ra biqewernê her metodê xoverdayîşî bişuxulnê.

- Xîlafê mabênê se benê wa bibê, hemverê kolonyalîstan ganî ma bibê yew, êyê ke xo nêdanê nizdê nê zî ganî Kurdistan de bêrê teşhîrkerdene.

Bi kilmî dewleta TC’yî ya faşîste nika xeylî herêmanê Kurdistanî de hêrişê qezencanê Kurdan kena. A game karo ke ganî ma bikerê no yo; hemverê dewleta TC’yî ya faşîste de hêzê xo bikerê yew û bi nameyê şarî sere wedarê.“