Mazlûm Dag û Abdurrahman Er hetê PDKyî ra tepişîyabî û cezaya îdamî dîyabî înan. Dag û Er Zîndanê Hewlêrî de, vera binpaykerdişanê heqan 43 rojî yo grevê vêşanîye de yê. 

Apê Erî Necmettîn Erî derheqê babete de ANFyî rê qisey kerd û dîyar kerd ke rewşa birazîyê ci roje bi roje bena xirabêr.

Necmettîn Erî pare kerd ke rewşa weşîye ya birazîyê ci Abdurrahman û Mazlûm Dag her roje bena xirabêr û vat: ''Ê binê tecrîdêkê giranî de yê. Ma nêeşkenê înan de têkilîye virazê. Embazêk derheqê înan de xebere ano ma rê. Ma rewşa înan ra qerqilîyenê. Rewşa Mazlûmî hîna hol a la yê birazîyê mi xirabêr a. Birazîyê mi 20 kîloyî dayê. Rixmo ke ê grevê vêşanîye de yê B1 nêdanê înan. Ma avûkatêk şawit, avûkat şi ame la netîce çin a. 

Seba ke înan kincê tektîpî qebul nêkerdî ameyî tecrîdkerdene, îşkence dî û raştê muameleya xirabe ameyî. Înan zî naye ser dest pê grevê vêşanîye kerd. La narey zî erzîyayî hucreyê yewkesî. Ma Rêxistina Efû ya Mîyanneteweyî de pêvînayîş kerd. Selahîyetdaran ma rê vat ke destê înan ra çi bêro do bikerê. La vat ke seba ke Başûr de şubeyê înan çin o bi rayîrê Buryê Bexdadî agahîye bidê. ''

Necmettîn Erî venga pêro terefgîranê demokrasî û heqanê merdiman da ke wayîrê nê ciwanan vejîyê.

Waştişê Er û Dagî wina yê:

1- Wa peynîya îşkence û muameleya xirabe bêra ardene

2- Wa kincê tektîpî nêrê ferzkerdene

3- Wa hucreyê yewkesî de nêtepişîyê, wirdî zî heman koxûşî de bêrê cakerdene.