Konseya Fermandarîye ya HPGyî kombîyayîşê xo yo serrane kerd. Konseya Fermandarîye ya HPGyî vat: ''Sey Konseya Fermandarîye ma kombîyayîşê xo yo serrane di rojanê verênan ê wisarê dewrê neweyî yê têkoşînî kerd. Nê wextî de ke têkoşşînê azadîye yê şarê ma safhayêka zaf girîng de ya, bi beşdarîya 50 embazanê waran kombîyayîşê xo bi serkewtişî ard ca. Ma bingeyê perspektîfanê Rayberê ma de xeta têkoşînî û pratîkê emserînî bi hîrayî nîqaş kerdî û birê girîngî girewtî. Kombîyayîşê ma yo ke 9 rojan dewam kerd tede hem analîzê sîyasîyî û leşkerî yê 2021î û rewşa nikayêne ya HPGyî ameyî ercnayene, hem zî seba ke serra têkoşînî ya 2022î biba serra serkewtişê şarê ma perspektîfê hewceyî ameyî dîyarkerdene, plansazîya şerî ya emserîne ameye amadekerdene û taktîkê leşkerî yê nê çaxî ameyî îfadekerdene.''

Eşkerayîya Konseya Fermandarîye de nê xusûsî ameyî nîşankerdene:

''Seke zanîyeno Têkoşînê Azadîye yê Kurdîstanî ke rayberîya PKKyî de yeno kerdene, serra 2021î de resa astêka berze û sîstemê tirkî yê kolonyalîst-qirker teng kerd û bêçare verda. Xoverdayîşê Garê yo ke destpêkê serra 2021î de qewimîya û asta xoverdayîşî yê Hemleyanê Bazanê Zagrosî, Cengê Xabûrî û Egîdanê Botanî resnaye aste tewr berze, planê dişmenî pûç kerdî û kerd ke krîzê mîyanê sîstemê faşîst-kolonyalîstî xorinêr bibo. Kombîyayîşê ma dîyar kerd ke no krîzê sîstemî têna leşkerî nîyo, sîyasî, komelkî û ekonomîk o û rejîmo faşîst ê AKP-MHPyî seba ke xo na rewşe ra bixelisno pêro çimeyanê welatî qedîneno, rewşa welatî nimneno û bi rayîrê şer û operasyonan şarî xapîneno. Eke vera na rewşe wezîfeyê têkoşînî yê nê wextî bêrê caardene, rejîmo faşîst do bêro rijnayene.

Kombîyayîşê ma zulm û faşîzmê rejîmê AKP-MHPyî, têkoşînê vera hêrişanê hegemonya yê modernîteya kapîtalîste de meseleyê têkoşînê takrîkî, polîtîk û îdeolojîkî yê hêzanê ma yê gerîlayan ercnayî û netîceyê girîngî vistî destî. Vera raştîya şerî ya dewrê zanistî-teknîkî rol û mîsyonê Hêzanê Pawitişê Şarî yê Kurdîstanî eşkera kerdî û eşkera kerd ke xeta têkoşînî û şer û dewro newe yê Gerîlayanê Modernîteya Demokratîke ganî senîn bibo. Kombîyayîşê ma de çarçewa meseleyanê taktîksel û kêmasîyan ê 2021î de têkoşîn bi giranî ame ercnayene, asta xorinbîyayîşî ameye îfadekerdene. Kombîyayîşê ma bi tewirê xurtî yê rexnekerdiş û rexnedayîşî yê prosesî astêka cidîye ya qerardare viste destî û esasê tecrubeyanê embazanê ma yê şehîdan, çarçewa perwerîya bi şehîdan û Rayber Apoıyî de zemînêk na ro ke 2022 de têkoşînê gerîlayanê azadîye serkewtiş bîyaro. Coka qerardarîya ney reyna ameye îfadekerdene ke vera pêro hêrişanê serê Rayberê ma, şarê ma û hêzanê ma bi ruhê fedayî yê Apogîrî cewab do bêro dayene û bi nê hawayî do nêzdîyê prosesî bêro kerdene.

Babetanê girîngan ra yew zî no yo ke xîretê şerê taybetî yê tirkan keno ke mîyanê kurdan de xeta ajanîye aktîf bikero û şer bivisno mîyanê kurdan. Rejîmê AKP-MHPyî bi hawayêkê topyekûnî hêrişê destkewte û erjanê şarê Kurdîstanî keno. Hemkarîya PDKyî ya bi nê rejîmî, şehadetê ke rîyê na hemkarîye ra bîyê bii hawayêkê cidîyî ameyî ercnayene û ame îfadekerdene ke vera ney yewîya neteweyîye wezîfeyêko lezabez û girîng o. Xiretanê seba çinkerdişê plananê şerê taybetî yê dişmenî û nêzdîbîyayîşê mesuldarîya neteweyî nîşanê ney danê ke vera pêro îxtîmalê rewşa xirabe ganî ma amade bibê û mîyanê pêro şert û mercan de zî ser bikewê. Nê esasî ser o ma îfade kerd ke tedbîrê hewceyî wa bêrê girewtene û xeta neteweya demokratîke ya Rayberîye do sey esasî bêra girewtene.

Na asta krîtîk û girînge ya têkoşînê ma de, kombîyayîşê ma bi hawayêkê serkewteyî qedîya. Birê tarîxî yê kombîyayîşê ma seba servistişê serra 2022yî gamê girîng ê. Vera hêrişan 2021î yê artêşa tirke xoverdayîşê ma yê Garê-Sîyanê, Zendûra, Mamreşo, Girê Sor û Werxelê seba têkoşînê 2022yî girîngîye nîşan keno. Kombîyayîşê ma pare kerd ke tecrubeyî eke bingeyê Perspektîfê Şerê Şarî yê Şorişgêrî de bi hawayêkê aktîfî bêrê caardene, sey şar û têgêrayîşî ma do destkewteyanê hîna pîlan bivisnê destî. Kombîyayîşê ma, çinkerdişê Komployê Mîyanneteweyî û caardişê azadîya Rayber Apoyî sey krîterê verênî yê serkewtişî pênase kerd û bire daye ke nê esasî ser o erk û wezîfeyê nê çaxî do bêrê caardene.

Nê esasî ser o nameyê HPGyî ser o bi ruhê çêrî yê embazanê ma şehîdan Cûmalî Çorûm, Şoreş Beytuşşebap, Rêber Zana, Hewram Avyer, Nûjîne Amed, Zerdeşt Navdar, Şîlane Goyî, Egîd Bismil, Diljîne Marya, Nûjîne Koçer, Hêjar Ûrfa, Serhat Giravî, Botan Ozgur, Mûnzûr Dersim û Çavrê Kamûran ma do rayîrê azadîya şarê ma û Rayberê öa de bi hawayêkê fedayî şorê û ser bikewê. Ma pêro şarê xo, embazanê xo, dostanê xo û hêzanê têkoşeran rê serkewtiş wazenê.''