Rayberê Şarê Kurdî Abdullah Ocalanî Zîndanê Amedî de binê tecrîdêkê mutlaqî de yo. Pêvînayîşê seba Abdullah Ocalanî yenê astengkerdene.

Dozgerîya Înfazî ya 2. ya Bursa 23ê êlule de Ocalan û 3 tepişteyanê bînan rê qedexeyê pêvînayîşî yê 6 mengan da. 'Xerîteya Rayîrî' ya Ocalanî ya ke 2009 de erşawitbi Mehkemeya Heqanê Merdiman a Ewropa (MHME) sey bahaneya qedexeyî ameye pêşkêşkerdene.

Avûkat Mesut Beştaşî ANFyî rê tecrîd ercna.

Beştaşî da zanayene ke tecrîdê Îmraliyî 22 serran ra nata dewam keno û vat: ''Polîtîkaya tecrîdî û meseleya kurdan girêdayîyê yewbînan ê.  Eke ma biewnê polîtîkaya tecrîdî ma nêzdîbîyayîşê dewlete yê vera kurdan fam kenê. Sîstemê Îmraliyî îlegal o. Vera Birêz Ocalanî têgêrayîşo şexsî esto. MHME zî îsbat kerd ke Birêz Ocalan bi hawayêkê îlegalî ame hukmkerdene. Coka ganî newe ra biameyêne hukmkerdene. La heyf ke wina nêbi û warê mîyanneteweyî zî seba naye tedaya dewleta tirke nêkerd. Çunke birêz Ocalan kesayetêko sîyasî yo û sîyasetê Tirkîya de rolê ey girîng o.''

Beştaşî ard ziwan ke nê prosesê tarîxîyî de hînî tecrîd nêno qebulkerdene û sey MHME dezgehanê mîyanneteweyîyan zî tecrîd sey îşkence û binpaykerdişê heqanê merdiman pênase kerd.

Beştaşî vist vîrî ke raporê CPTyî de zî tecrîd ame rexnekerdene û da zanayene ke CPTyî reya verêne tecrîd bi hawayêkê zelalî qebul kerd. Beştaşî vat: ''Rixmê ney zî CPTyî seba ke tecrîd wedarîyo gamêke nêeşte. Seba ke tecrîd biqedo ganî Yewîya Ewropa (YE) vera Tirkîya teda bikera. Ganî welatê Ewropa zî raporê CPTyî xo rê esas bigêrê û Tirkîya hîşyar bikerê. Eke Tirkîya giranîye nêda nê hîşyarîyan wa welatê Ewropa Tirkîya rê ambargo zî bikerê. La ma vînenê ke YE û dezgehê mîyanneteweyî derheqê tecrîdî de hîsger nîyê. Çunke mabênê înan û Tirkîya de peymanê sîyasî û bazirganîye estê.''