Silêmanî de derheqê ''Têkoşînê vera DAÎŞî û aqibetê tepişeyanê daîşijan'' de komxebete ameye kerdene. Başûrê Kurdîstanî, Îdareyê Xoserî yê Rojawanî û Ewropa ra xeylêk kesî tewrê komxebate bîyî.

Komxebate de derheqê qirkerdiş û hêrişanê çeteyanê DAÎŞî de sînevîzyon ame ramojnayene. Sînevîzyon de xoverdayîşê gerîlayanê PKKyî û şerwananê YPG-YPJyî yê Rojawan û Şingalî zî ame ramojnayene.

Endamê Grûba Paştîdayîşê Rojawanî Bekîr Şêx Salîmî ke komxebate de qisey kerd bale ante hêrişanê peyênan ê DAÎŞî ser û vat: ''Demê peyênî de Başûrê Kurdîstanî, Rojawan û Iraq de têgêrayîşê çeteyan zêdîya. Eke hêrişê çeteyanê ê vera Hesekê ser bikewtêne no têna semedê kurdan nê semedê heme dinya do bibiyêne sebebê tehlukeyê pîlî. Na çarçewe de ma derheqê têkoşînê vera DAÎŞî û tewirê hukmatê Iraqî yê vera çeteyanê tepişteyan de do muneqeşe bikerê. Têna şarê kurdî nê berpirsîyarîya hêzanê mîyanneteweyî zî gird a.''

Panelîstanê komxebate ra Endamê Fermandarîya Pêroyî ya QSDyî Sozdare Derîk zî vat: ''Rojawan de vera DAÎŞî têkoşîno xort ame rayraberdene. Hesekê ke tewr peynî de ma 121 şehîdî dayî. Şorişê Rojawanî de bi des hezaran şehîdê ma estê. Her hetê Kurdîstanî ra êyê ke tewrê xoverdayîşî bîyî şehîd bîyî.  DAÎŞ netîceya bedelanê pîlan de bin kewt. Bi des hezaran çeteyê DAÎŞî tepişte yê la berpirsîyarîya înan têna rijîyaye ma ser. Efrîn, Serêkanîyê û Girê Sipî de hêrişê terorî ameyî kerdene û hetê dewleta tirke ra ameyî îşxalkerdene. Bi seyan kesî ameyî qetilkerdene. Bi seyan kesî raştê tecawuzî ameyî û ameyî remnayene ke hema zî aqibetê înan bewlî nîno.''

Reyna panelîstanê bînan zî derheqê muhîmîya têkoşînê vera DAÎŞî de qisey kerd û vat ganî paştî bidîyo Rojawanî.

Netîceya komxebate de madeyê esasî yê ke vejîyayî werte wina yê:

*Hêrişê peyênî yê Hesekê ramojna ke DAÎŞ hema seba heme dinya tehlukeyo pîl o.

*Seba ke zîndanî goreyê standartanê mîyanneteweyî bêrê kontrolkerdene ganî hêzê mîyanneteweyî paştî bidê Rojawanî.

*Ganî semedê muhakemekerdişê çeteyanê DAÎŞî herêma Îdareyê Xoserî de mehkeme bêro ronayene.

* Seba ke keyeyê daîşijan agêrê welatanê xo ganî xebatî bêrê rayraberdene.

*Ganî  rewşa ekonomîke ya Herêma Xoserî  bêro vînayene û verê Pêkerdişê Qeyserî bêro girewtene.

*Ganî paştî bidîyo Îdareyê Xoserî û semedê paştîdayîşê şarî programêk bêro amadekerdene.

* Herême ke dewleta tirke îşxal kerdî bîyî merkezê barigehanê leşkerîyan ê DAÎŞî. Ganî partî û hêzê herême şirê Tirkîya ser ke wa nê herêman ra vejîyo.

*Tirkîya bi destê DAÎŞî Rojawan de kaos vejeno. Ganî vera nê nêrazîbîyayîşo mîyanneteweyî bêro ramojnayene.

* Ganî mabênê Herêma Kurdîstanî û Îdareyê Xoserî de yewîya sîyasîye û ekonomîke bibo. Reyna vera DAÎŞî ganî Rojawan û Başûrê Kurdîstanî têkoşînê hemparî rayra bêrê.

* Sebake şarê Şingalî agêro erdê xo ganî paştdayîşê asayîşî bêro dayene.  Semedê Şingalî hetkarîya madî manewî do bêro kerdene.

*Semedê akerdişê beranê Til Koçer û Rebie komelê mîyannetewî rê zafêr zext bêro kerdene.