Gerîlayan bale ante serê polîtîkaya dewleta Tirkî ya merdiman ra vengkerdişê Başûrê Kurdistanî û vat ê do na polîtîka bin fînê.

 Gerîlayê HPG’yî Gîvara Kurdan ANF’yî rê qisey kerd û vat ke amacê dewleta Tirkî tena PKK nêyo, hemeyê şarê Kurdî yo û ganî na yewe bêro zanayene. Gîvara Kurdan qewimîyayîşê Şêladizê bi vîr vistî û vat, “Ciwanî şehîd bîyî la PDK bêveng mend, hetkarî nêdaye şarî. Ser de zî dewleta Tirkî ra uzr waşt. PDK rixmo ke ziraro ke virazîyayo vînena û haya aye şehadetan ra esta zî seke çîyêk çinbo têgêrena û kewta tewirêkê winayênî mîyan. La nêfikrêna Kurdistan yeno talankerdene yan nê. Şarê Şêladizê na yewe ra no dî û sere wedart. PDK’yî xeylî ciwanê ke a roje hemverê na polîtîka de weriştîbî eştî zîndan.”

 Pawitişê Başûrê Kurdistanî Wezîfeyê Ma yo

Gîvara Kurdan ard ziwan ke şarê Başûrê Kurdistanî şaşîya polîtîkaya PDK’yî vîneno û vat, “Ma, gerîlayî, bi serran o nê erdî de yê û erdê Başûrî pawenê. Wezîfeyê ma yo ke ma nê erdî bipawê. Xora wezîfeyê gerîlayan o ke seba azadîye mucadele bikero, seba azadîye şer bikero û erdê xo bipawo, gerîla xo ra yeno a mana. Ma amade yê ke cuya xo nê oxirî de bide. Ganî şarê ma hemverê na yewe de bêveng memano. Eke bimano do qirkerdişê yê sey Kortekî bibê vêşî, do hîna zaf hêrişê şarî bikerê. Dewleta Tirkî wazena Kurdan hemverê yewbînan de bido şerkerdene û Başûr bê merdiman verdo.”

‘Mesele PKK Nîyo, Mesele Kurdî Heme yê’

Gerîla Gîvara Kurdan vist vîr ke dewleta Tirkî hêrişê şarî kena û vat, „Xemê înan nêyo biçek yan zî bêçek bo. Kurdan kena hedefe. Mesele PKK nîyo, mesele Kurdî heme yê. Estbîyayîşê şarê Kurdî yê Başûrî qebul nêkena.“

„Xoverdayîşê Gerîlayan do Dewam Bikero“

Gerîlaya YJA Starî Binevş Agire zî bale ante serê çalakîyanê gerîlayan ê hemverê hêrişanê îşxalî yê dewleta Tirkî û vat ke do heta peynî mucadele bikerê. Binevş Agire vat, „Çalakîyê suyîqestî, sabotajî ameyî kerdene. Gerîlayî Başûr de eşkenê bikewê mîyanê meterîsanê leşekranê Tirkî. Dewleta Tirkî fam kerd ke bi operasyonanê bejikîyan nêeşkena netîce bigêro. Kena ke bi teknîkî nê bikero. Labelê merdiman û îradeyê merdiman nêhesebnena. Rixmê hende hêrişan de şar erdê xo ca nêverdano, erdê xo paweno. Ma heta peynî şarî xo dir ê.“