Gerîlayê ke bi taktîk û tewirê xo rixmê heme îmkananê teknîkî yê dewleta Tirkî ya îşxalkare hêrişê înan pûç vejenê, Xakurkê de tarîxê xoverdayîşî nusenê. Gerîlayan vat ê derbeyanê girdan danê dişmenî rê û waşt ke wa çew zûranê medyaya şerî ya dewleta Tirkî ra bawer nêkero.

Hêrişê Serê Başûrê Kurdistanî Vera Heme Kurdistanî yo

Gerîla Mahîr Aslano ke Rojakewtene ra tewrê sefanê gerîlayî bîyo vat: ‘’Hêrişê dewleta Tirkî yê vera Xakurkê teyna Xakurkê rê nêno kerdene, no vera hema Kurdan û Kurdistanî yo. Ma kewte merhaleyêka neweye. Na merhale Rayber Apo sey Şerê Dinya yê 3. ercneno. Ma serê  kayê tarîxî yenê kaykerdene. Bitaybetî zî dewleta Tirkî ya ke xo serê qirkerdişê Kurdan înşa kerdo vera yewbîyayîş û destkewteyanê Kurdan hêrişanê xo zêdînena. Wazenê ke Başûrê Kurdistanî îşxal bikerê. Amancê înan oyo ke destkewteyanê Kurdan dest ra bîgêrê û  heme Kurdistan îşxal bikerê. Başûrê Kurdistanî qeleya Kurdistanî ya, merkezê serwedartişî yo. Tarîxê ci bi qehremanîye dekerde yo. Ganî şarê Başûrî bi ruhê Şeladizê û Bamernê hûrzo lingan ser û vera îşxalî tewirê xo heme dinya rê ramojno. Pawitişê destkewteyan deynê ma yê şehîdan o. Sere de şehîdê Enfal û Halepçe ma heme şehîdanê xo rê deyndarê ke destkewteyanê xo bipawê.  Ganî her çar leteyanê Kurdistanî de rayberîya Başûr de heme Kurdî yew bî destê xo bidê yew bînan û vera îşxalkaran xoverdayîş gird bikerê. Wext wextê vera îşxalkaran û hemkaranê înan serewedartişî yo.’’

Gerîla  Xakurkê de Xoverdayîşo Tarîxî Dano

Agît Firato ke bajarê Riha yê Vakurê Kurditanî ra yo ey zî bale atne serê tewirê şerî yê gerîlayî û nê vatî: ’’ Vera Başûrê Kurdistanî hêrişêko xurt esto.  Nika tîya şerêko gird esto. No ne operasyonê Tirkan o verên ne zî peyên o. Vera naye tecrubeyê ma yê 40 serran esto. Bitaybetî zî serra 2016 de Ertûş û Lelîkan de ma bi taktîkê xo yê neweyî dişmen serûbin kerd. Nika hêrişî zafî hewa ra benê la gerîla bi tewirê xo yê neweyî yê demî teknîkê dişmenê pûç vejeno.  Ma hemleyêka sey  hem her ca de yê hem qet cayêk de nêyê pêard. Nika ma Xakurkê de her ca de yê. Binê her kerra û dare de ma vera îşxalî xoverdayîşo tarîxî danê. Namlûyê ma serê înan de yê. Peynîya înan do xusran bo.’’

Ganî Ciwanî Verê Xo Bidê Koyanê Kurdistanî

Kobanêyij Baz Kobanê zî nê ardî ziwan: ’’Dewleta Tirkî ya îşxalkare wazena ke Başûrê Kurdistanî îşxal bikero. Bitaybetî ciwanî ganî vera naye bêveng nêmanê. Teyna cimato ke erdê xo paweno rêz vîneno.  Îşxalkarî wazenê ke çîyê ke ê ma yê destê ma ra bîgêrê. Vera naye ganî ma hurzê lingan ser. Ciwanî wa tewrê Têgêrayîşşê Azadîye bibê. Bi ruhê xoverdayîşê Kobanê û Şeladizê  wa şarê ma sere wedaro. Ewro Amedîye, Goşîne reyna Binarê Qendîl de şarê ma yeno qetilkerdene.  Nê koyî halîngê gerîlayanê azadîye yê. Mewzîyê xoverdayîşî yê  Kurdan û şarê Kurdistanî yê vera  zaliman ê. Ma sey gerîlayê Kurdistanî do heta peynî wayîr herra xo bivejîyê. Tewirê ma ya Kurdistan ya zî Kurdistan o. Heta çilka gonîya xo ya peyêne ma do xeta Rayber Apoyî de vera îşxalkaran herra xo bipawê.’’