Merkezê Çapemenî û Îrtîbatî yê HPG’yî derheqê çalakîyanê gerîlayan de eşkerayîyêka nuştekîye weşanaye. HPG’yî vat çalakîya hêzanê gerîlayan ê qezaya Geverî ya Colemêrgî de 13 leşkerê artêşa Tirkî ya îşxalkare ameyê kiştene.

 Detayê eşkerayîya HPG’yî wina yê:

 “Hêzanê ma çarçewaya Hemleya Şorişgêre ya Şehîd Bager û Şehîd Ronya de, roja 29’ê Temmuze hemverê artêşa TC’yî ya îşxalkare de rêzeçalakîyê bitesîrî viraştî. Hayîdarîyê eleqedarê çalakîyan wina yê:

 Hêzanê ma saete 10:30 de hemverê yewîya operasyonî ya ke dorê Qilê Şehîd Sarya yê herêma Xakurkê ya Wareyê Pawitişî yê Medya de bica bîbî çalakîyêk viraşte. Bi hawayêkê serkewteyî yewîya dişmenî amî pirodayene, hûmara kişte û birîndaran nêamî tespîtkerdene.

 Gever de Wesayîto Zirxin Ame Raşanayene, 13 Leşkerî Ameyî Kiştene

Hêzanê ma saete 11:30 de hemverê konvoyê zirxinî yê artêşa TC‘yî ya îşxalkare ke Qereqolê Astenga Reşî ra ver bi qereqolê Wargenima ya qezaya Geverî ya Colemêrgî şîyêne çalakîyêk viraşte. Na çalakîya ke bi taktikê sabotajî amî viraştene de wesayîtêko zirxin ame raşanayene û 13 leşkerî ameyî kiştene. Çalakîye ra dima artêşa Tirkî ya îşxalkare bi çekanê giranan herême gulevaran kerde û bi helîkopteranê Skorskyan kişte û birîndarê xo herême ra wedartî.

Qezaya Çelê de Sewqîyato Leşkerî

Roja 29’ê Temmuze saete mabênê 21:00 û 23:00 de artêşa TC‘yî ya îşxalkare xeylî wesayîtê zirxinî sewqê Girê Koordîne yê qezaya Çelê ya Colemêrgî kerdî. Gama sewqîyatî de helîkopterê tîpê kobrayî ke herêmanê Xeregol û Şelalê ser o bombayî varnayêne bi hedefê hêzanê ma. Hêzanê ma bi hawayêkê giranî da helîkopterî ro û helîkopter mecbûr mend ke herême ra dûrî bikewo.

Hemverê Wesayîto ke Malzemeyê Leşkerîyî Tede Estbî Çalakîyêk Amî Viraştene

Hêzanê ma çarçewaya Hemleya Qesasî ya Şehîd Medya Mawa û Şehîd Rizgar Geverî ya ke herêma Botanî de dewam kerdêne, roja 28’ê Temmuze saete 17:15 de hemverê wesayîtêk ke malzemeyê leşkerîyî qereqolê Şûxa ya qezaya Berwarî ya Sêrtî rê berdêne çalakîyêk viraşte. Bi hawayêkê serkewteyî wesayîtê dişmenî ame pirodayene û hûmara kişte û birîndaran nêamî tespîtkerdene. Dimayê çalakîye artêşa TC’yî ya îşxalkare bi çekanê giranan herême bombardûman kerde û netîceyê bombardûmanî de herême de adir vejîya.

Qezaya Tetwanî ya Bedlîsî de 4 Gerîlayî Şehîd Bîyî

Roja 27’ê Temmuze saete 09:30 de teyareyanê şerî yê artêşa TC’yî ya îşxalkare herêma dewa Cangiza ya qezaya Tetwanî ya Bedlîsî ser o bombayî varnayî. Nê bombardûmanî de 4 hemrayê ma şehîd bîyî. Bombardûmanî ra dima artêşa TC’yî ya îşxalkare herême de operasyon da destpêkerdene. Operasyon heman roje saete 14:30 de herême ra ancîya. Hayîdarîyê derheqê nasnameyanê hemrayanê ma yê şehîdan do dima ra rayapêroyîye dir bêrê parekerdene.

Teyareyanê Şerî Wareyê Pawitişî yê Medya Ser o Bombayî Varnayî

Roja 29’ê Temmuze balafiranê şerî yê artêşa TC’yî ya îşxalkare Wareyê Pawitişî yê Medya ser o bombayî varnayî. Na çarçewa de teyareyan saete 13:00 de herêma Tepê Sor a herêma Avaşînî, saete 19:00 de herêma Werxelê ya herêma Zapî, saete 22:45 de zî herêma Şehîd Berîtan a herêma Xakurkê bombarduman kerd. Nê bombardumanan de çîyêk bi hêzanê ma nêbîyo.”