Artêşa tirke ya îşxalkere 14ê nîsana 2022yî ra nata hêrişê Herêmanê Pawitişî yê Medya kena. Artêşa îşxalkere nê hêrişan de çekanê teknolojîkan reyde çekê kîmyewîyî û bombaya nuklere ya taktîkî zî şuxilnayî.

Artêşa îşxalkere bêvengîya dezgehanê mîyanneteweyîyan xo rê firsend dîye û sûcê xo yê şerî zêdînayî. Wexto ke artêşa tirke ya îşxalkere vera tunelanê şerî yê Girê Şehîd Pîrdoxanî yê Warê Xoverdayîşî yê Girê Amedîyê yê Metîna bombaya nuklere û çekê kîmyewîyî şuxilnayêne dîmenê teqayîşî ameyî qeydkerdene.

Dîmenan de aseno ke artêşa îşxalkere kena ke pê bombaya nuklere tunelanê şerî biteqîna. Vengê teqayîşî dûrî ra yenê û leşkerê îşxalkerî zî dekewtişê tunelan kontrol kenê. Dima xeylêk leşkerê tirkî yê îşxalkerî çekanê kîmyewîyanê ke tira gazê jehrînî vejîyenê, tunelan de cakenê.

Çeka kîmyewîye zî hetê xeylêk leşkeran ra yena cakerdene. Dima leşkerê îşxalkerî herême teriknenê û aseno ke çekê kîmyewîyî dûrî ra yenê aktîvekerdene û dima nînan ra dûyê jehrînî vejîyenê.

Merkezê Îrtîbatî û Çapemenîye yê HPGyî bîlançoya şerî ya 5 mengan de dabi zanayene ke artêşa tirke ya îşxalkere 2004 reyî hêrişê kîmyewîyî kerdê û nê hêrişî hetê HPGyî ra ameyê belgekerdene.