Hemvervatoxanê HDPyî yê Çewlîgî da zanayene ke binê nameyê 'Yaşamsporî' de çimeyî pêşkêşê terefgîranê îqtîdarî ameyê kerdene û vat: ''Ma do meverdê ke pereyê doman û ciwananê ma şima rê şoro. Ma do hesabê her quruşî pers bikerê.''
Hemvervatoxanê HDPyî yê Çewlîgî Ferhat Yildirim û Hatîce Kitay cewab da eşkerayîya ke Şaredarîya Çewlîgî derheqê Yaşamsporî de dabî.
Hemvervatpxan pare kerd ke Yaşamspor serê rîpelî de esto la a raşte qey yew caardişê ci çin o. Hemvervatoxan vat: ''Grûba Meclîsî ya Şaredarîye îdîa kerd ke înan 2019-2020 de û 2021 de 875 hezar û 500 lîra dayo Yaşamsporî. Nê serran de janî ra sebebê falîyetê sporî nêameybî kerdene. O çax no pere dîyayo kamca? Ganî şima ney eşkera bikerê. Ma menga kanûne de Meclîsê Şaredarîye de na babete arde rojdem la cewabê nakokî dîyayî ma. Coka ma bire daye ke babet berê Meclîsê Pîlî. Wa şarê ma zî înternetî ra biewno rîpelê Yaşamsporî.
Eqsê îdîayanê Şaredarîya Çewlîgî Yaşamsporî heta nika qet yew falîyet nêkerdo. Ma do hesabê her quruşo ke şima dayo Yaşamsporî bipersê. Ma meverdê ke şima pereyê ciwan û domananê ma xo û terefgîranê xo rê bigêrê. Ma sey HDPyî falîyetanê sporî de hetê pêro klubanê do yê.''
