Qezaya Gêxî ya Çewlîgî de hetê Yewîya Komeleyanê Gêxî ra Festîvala Xoza û Kulturî do biameyêne kerdene. Festîvala ke do 12-13ê tebaxe de biameyêne kerdene hetê qeymaqemîye ra vizêr amebî qedexekerdene.

Nameyê Komeleya Kultur, Hetkarî û Averberdişî ya Gêxî, Dep, Azarpêrt, Xorxol û Çêrme (KAYY-DER) ser o Hemserek Ahmet Tuzunî bi eşkerayîyêka nuştekîye vera qedexeyê festîvale nêrazîbîyayîşê xo mojna. 

Ahmet Tuzunî eşkerayîye de da zanayene ke 2012 ra nata bi bahaneya asayîşî festîvalê înan yenê qedexekerdene la şaristananê cîranan de festîvalî dewam kenê. Tuzunî vat: ''Qezaya Gêxîya ke qezayêka averşîyaye bîye, bi polîtîkayan bê merdiman yena verdayene bîye qezayêka kanwaze. Na festîvale do moral bidayêne şar û esnafanê Gêxî û tede aktîvîteyê kultur û ziwanê ci biameyêne kerdene. La festîvale pê bahaneyan çarçewa polîtîkaya cezakerdişê şarî de ameye betalkerdene. Ma sey KAYY-DERî nê qedexeyî şermezar kenê. Ma do rojêke qetî festîvalanê tewr rindan berê şarê ma yê Gêxî.''