Teyareyanê şerî yê artêşa Tirkî ya îşxalkare şewa bîne Kampa Koçberan a Şehîd Rustem Cûdîyî ya Mexmûrî bomba kerde û netîce de 2 sivîlî birîndar bîyî.

Hemwelatijê Kampa Koçberan a Şehîd Rustem Cûdîyî (Mexmûr) hemverê bombarduman û îşxalkarîya dewleta Tirkî de rayra şîyî. Rayraşîyayîşo ke verê berê şaredarîya kampe de dest pêkerd heta verê awanîya Neteweyê Yewbîyayeyî (NY) dewam kerd. Rayraşîyayîş de sloganê ‘Biciwîyo Serek Apo’, ‘Şehîdî Nêmirenê’ û ‘Bimiro Xîyanet’ ameyî eştene. Verê berê NY de seba temamê şehîdanê Têgêrayîşê Azadîya Kurdistanî deqeyêk seba hurmetî ame vindertene. Dimayê hurmetramotişî ra hetê mamoste Hesin Demîrî ra eşkerayîye amî wendene.

‘Hêrişê Îşxalkarîye û Kolonyalî Serê Erdê Kurdistanî de Yenê Kerdene’

Eşkerayîye de ame vatene: “Ma şarê Kurd û Kurdistanî prosesanê muhîman ê ke ver bi serkewtişî şinê ra ravêrenê. Her perçeyê Kurdistanî de hêrişê îşxalkarîye û kolonyalî serê erdê Kurdistanî de yenê kerdene. Heme dinya hemverê na îşxalkarîye de çimê xo girewtê. Serra 2012’î de çeteyê dewleta Tirkî yê bi nameyê DAÎŞ’î hêrişêkê îşxalkarîye serê erdê Başûr û pêroyîya Rojawanê Kurdistanî de kerdibi. Seba şaranê bindestan şoriş yeno manaya estbîyayîşî. Seba şarê Kurdî bicaardişê şorişî umîdê azadbîyayîşî yo. Bêguman no umîdê azadîye Rojawanê Kurdistanî de zergûn bîyo û seba şaranê azadîperweran bîyo sembolêk.”

‘Şorişê Rojawanî Hemverê Sîstemê Kolekerdişî de Bîyo Alternatîf’

Heman wextî de eşkerayîye de bale ancîyaye sere şorişê Rojawanî û wina ame vatene: “Demo ke ma bingeyê dewlete ser o vindenê ma vînenê ke amac kolekerdişê şaran o. Şorişê Rojawanî zî bîyo alternatîfêkê hemverê sîstemê kolebîyayîşî. Na yewe ra zî tim beno hedefê hêrişanê hemeyê dinya. Nimûneyê nê yo tewr eşkera îşxalê Efrînî yo. Ma nê şorişî sere de Rayberîye, xazîyanê nê şorişî û temamê şarê Kurdî rê pîroz kenê. Ma heme şehîdanê ke nê şorişî de şehîd bîyê bi vîr anê û ma bejna xo hemverê heme şehîdanê Kurdistanî de namnenê.”

‘Wa Îşxalkar û Hemkarê Înan Bicemîyê, Ma Sere Nêdanê ro’

Eşkerayî bi nê vatişî qedîyaye: “Serrgêra hewtine ya şorişê Rojawanê Kurdistanî de, hêrişo ke serê şarê Kampa Şehîd Rustemî de virazîyayo alelade nêyo. Amacê dewleta îşxalkar a faşîste ya Tirkîya o yo ke Kurdêk kamca biciwîyo bireso ûca û raste ra wedarê. Ma sey kampa Mexmûrî her roje hetê leşkerî de û hetê sîyasîyî de hêrişê cîyayan dir têrî manenê. Ancî bêvengmendişê NY û hukmatê Iraqî yeno manaya hetkarîya nê hêrişî. Wa dewleta îşxalkare û hemkarê ci PDK rind bizanê ke şarê Kampe çi rey hemverê nê hêrişan de sere nêdano ro. Xeta mucadele û xoverdayîşî ra peyde game nêerzeno. Çunke êyê ke xover danê ser kewenê. Ma reyna nê hêrişî şermezar kenê.” Çalakî bi slogananê ‘Biciwîyo Serek Apo’, ‘Biciwîyo Xoverdayîşê şaranê bindestan’, ‘Bimiro Îşxalkarîye û heme tewir koletî’ qedîyaye.