Hêrîşê dewleta tirke erd û hewayî ra dewam kenê
Hêzanê gerîlayan rîyê erdlerzî ra çalakîyê xo yê eskerî vindarnaybî, la hêrişê dewleta tirke ya îşxalkere, hemverê gerîlayan de hem erd hem zî hewayî ra bêmabên dewam kenê.
Merkezê Îrtîbatî û Çapemenîye yê HPGyî derheqê hêrişanê dewleta tirke ya îşxalkere de eşkerayîye daye. HPGyî vat: ''Artêşa tirke ya îşxalkere bi teknîkê giranî hêrişê Gerîlayanê Azadîye yê Kurdîstanî kena ke pozîsyonê xopawitişî de yê. Rixmê heme hêrişan hêzê ma rewaşa xo pawenê û çarçawaya pawitişê meşrûyî de cewabê îşxalkeran danê.''
Zanayîşê hîrayî yê hêrîşanê ertêşa tirke ya îşxalkere wina yê:
Herêma Zapî de;
13ê sibate de cemê sibayî mewzîyê xoverdayîşî yê warê Çemçoyî yê Şeladizê yê Amedîyê hetê îşxalkeran ra bi çekanê giranan ameyî bombardumankerdene. Hêzanê ma seba ke xopawitişî bi çekanê giranan cewab da. Îşxalkerêk ame cezakerdene û îşxalkerêk zî bîrîndar bi. Eynî roje cemê şanî, eynî warî de reyna mewzîyê xoverdayîşî dîyayî bombayan ver. Hêzanê ma seba ke xo bipawê, bi çalakîya suîqestî cewab da îşxalkeran. Îşxalkerêk ame cezakerdene. Reyna dormeyê dewa Sîda ya Amedîyê de zî mewzîyê xoverdayîşî hetê îşxalkeran ra dîyayî bombayan ver. Hêzanê ma seba ke xo bipawê, bi çekanê giranan cewab da.
Hêrişê çekanê kîmyayî û bombayanê qedexeyan
13ê sibate de mewzîyê têkoşînî yê dormeyê dewa Sîda ya Şeladizê yê Amedîye hetê îşxalkeran ra reyêke bi bombeyanê qedexeyan ameyî bombardumankerdene. Eynî roje mewzîyê xoverdayîşî yê warê Çemçoyî çar reyî bi helîkopteranê hêrîşî dîyayî bombayan ver. Reyna mewzîyê xoverdayîşî yê gerîlayan ê Warê Xoverdayîşî yê Girê Cûdî û warê Çemçoyî hetê îşxalkeran ra 38 reyî bi obus, tanq û çekanê giranan ameyî bombardumankerdene.’’
