Saraya Qijkeke ya tarîxîye ya Hesenkeyfî yo ke bi Awbendê Ilisûyî yeno waştene ke binê awe de bêro verdayene tehlukeyê raşîyayîşî dir amîya têrî. Dêzê Hesenkeyfî yê tarîxîyî de û Newala Dîcle de hewna ke xebata betonkerdişî ya ke berzîya ci 50 metreyî û dergîya ci hezar metreyî ya dewam kena, binê dêzî de zî xebata awankerdişê lîmanî amî destpêkerdene. Seba ke do dormeyê dêzî binê awe de bimano no lîman yeno viraştene, serê dêzî do bi beton bêro girewtene û Saraya Qijkeke zî do bêro panayene. Dêsê dêzî bi beton û asinan yeno ‘pêtkerdene’. Ame zanayene ke rîyê lerzayîşanê makîneyanê giranan ra dêsanê saray de rîskê masayîşî û raşîyayîşî virazîyayo.

Rîskê Raşîyayîşî

Temamê şaristanê tarîxîyî agêrayo wareyê înşaatî, binê dêsanê dêzê tarîxîyî de zî “lîmano antîk” yeno awankerdene. Dimayo ke Hesenkeyf do binê awe de bêro verdayene do dîyarê dêzî de awbendike bêro viraştene. Seba ke bieşkê na awbendike de bigêrê kîşta dêsanê dêzî de lîman yeno viraştene. Esasê lîmanî rojanê ravêrteyan de bi rişnayîşê betony ame eştene. Dewesîyayîşo ke rîyê makîneyanê karî ra vejêno werte, beno sebebê rîskê raşîyayîşê Saraya Qijkeke.

Ame zanayene ke dimayê zanayîşê rîskê raşîyayîşê Saraya Qijkeke ra roja Dişemeyî ra nata xebata betonkerdişî rê mabên ameyo dayene. Muhendîsî, hemverê îhtîmalê rîskê raşîyayîşî de wekendişan kenê.