Organîzasyonanê cimatê sivîlî, ekolojîkî û meslekîyan, binawekerdişê Hesenkeyfî şermezar kerd. Parlamentera HDP’yî ya Êlihî Ayşe Acar Başarane vat ke seba kozanê sîyasîyan ê mîyanneteweyîyan Hesenkeyfî çinê mekerê û vat, „Hesenkeyf cayê xo de weşik o.“
Koordînasyonê Hesenkeyfî, Têgêrayîşo Ekolojîk ê Mezopotamya û Teşebusê Ciwînayîşê Hesenkeyfî, çarçewaya aktîvîteya „Erzîyayîşê Pîlî“ de waşt ke binawekerdişê Hesenkeyfî şermezar bikerê. La polîs û leşkeran çalakîya ke ameyêne waştene Hesenkeyf de virazîyo asteng kerde. 
Endama Komîteya Kultur û Perwerdeyî ya Parlamentoyê Ewropa Julie Warde, parlamentera HDP’yî ya Êlihî Ayşe Acar Başarane, parlamenterê Mûşî Mensûr Işik, organîzasyonê cimatê sivîlan û meslekîyan ê bajarî paştî daye çalakîye.
'Destûr Nêdayîş Şermêko Pîl o‘
Seba ke polîs û leşkeran destûr nêda çalakîye, kîtle eşkerayî daye. Eşkerayîye de pankartê „Seba Hesenkeyfî erey nêyo“ û „Nasnameyê ma, kulturê ma, xozaya ma, tarîxê ma Hesenkeyf o, des medê pa“ ameyî akerdene. Parlamentera HDP’yî Ayşe Acar Başarane, eşkerayîye de qisey kerd û wina vat, „No seba sîstemê huqûqî û demokrasîyê Tirkîya şermêko pîl o. seba Awbendêkê 50 serran û kozê sîyasîyî yê mîyanneteweyîyî Hesenkeyfî çin mekerê. Hesenkeyf cayê xo de weşik o. Şarê Êlihî û şarê Hesenkeyfî nê projeyî nêwazeno. Qe erey nêyo. Dinya de nimûneyê nê estê. Ma veng danê rayapêroyîye ya demokratîke. Seba Hesenkeyfî mucadeleyê xo bidomnê.“
Endama Kultur û Perwerdeyî ya Parlamentoyê Ewropa Julia Warde zî ard ziwan ke seba viraştişê awbendan rast nêyo ke merdimî tarîx û xoza çinê kerê û wina vat: „Seba pawitişê mîrasê merdimîye ma menga Hezîrane de ameyî tîya. Awe nêgirewte, ma nêwazenê awe bigêro. Seba mîrasê merdimîye tena îqtîdarêk nêeşkeno qerar bido.“
'5 Reyî Proje Vindarna‘
Parlamenterê HDP’yî Mensûr Işikî sere nameyê beşdaran de eşkerayî daye û wina vat, „No resim maneno resimê berhemanê tarîxîyan ê ke hetê DAÎŞ’î ra ameyî raşanayene. Royê Dîcle, bi merdim û kulturê xo verê mergî de yo. Selahîyetdaranê dewleta Tirkî seba ke Royê Dîcle bifetesnê verê 22 serran dest bi projeyêka winayêne kerde. Tam 5 reyî projeyê Ilisû ame vindarnayene. La reyna ê nêewnîyayî îradeyê şarî ra û dest bi awankerdişê projeyê xo kerd.” Işikî waşt hukmat projeyê Awbendê Ilisû vindarno û seba xelesnayîşê Hesenkeyfî veng da rayapêroyîye ke mucadele bikero.
