Rojnameger û nuştox Hesen Cûdîyî bi wesîleya serrgêra Komployê Mîyanneteweyî yê vera Rayberê Şarê Kurdî Abdullah Ocalanî ANFyî rê qisey kerd.

Cûdîyî bale ante ser ke ziwan, kultur û nasnameyê kurdan tim maruzê hêrişan bîyî, kurdî tim maruzê qirkerdişan bîyî. Cûdîyî da zanayene ke armancê nê hêrişan qirkerdişê kurdan bi û vat: ''Verî pê Peymana Lozanî vera kurdan komployêko pîl ame kerdene. Peymana Lozanî înkar, vergirewtiş, koçkerdiş û parçkerdişê kurdan armanc kerdêne. PKKyî qirkerdişê kurdan vindarna û pê felsefeya Rayber Apoyî verê parçebîyayîşê Kurdîstanî girewt. Rayber Apoyî û PKKyî Lozan vist bin.

Gama yewine ya komployî na ya ke PKK gêrîyaye lîsteya terorî. Reyna Şam û Lubnan de vera Rayber Apoyî xeylêk hêriş û suîkastî ameyî kerdene. Tewr peyên zî xîretê 9ê teşrîna verêne qewimîya. Înan Rayber Apo xo ver de sey astengîyêke dî û komployo mîyanneteweyî plan kerd û ard ca. Temsîlkarê çareserîya meseleya kurdan Rayber Apo yo. Wa her kes seba çareserîya meseleyan azadîya Rayber Apoyî biwazo. Meseleya kurdan bê ey çareser nêbena, heta ke Ocalan azad nêbo Rojhelatê Mîyanênî de meseleyêke zî çareser nêbena.''

Hesen Cûdîyî tecrîdê Îmraliyî vist vîrî û vat: ''Tecrîdê Îmraliyî ra Konseya Ewropa, Ewropa, Amerîka mesuldar ê. Înan meseleya kurdan afernaya, Rayber Apo teslîmê Tirkîya kerd. Caardişê azadîya Rayber Apoyî wezîfeyê ma yo verên o. Eke Rayber Apo hema zî zîndan de yo yew manaya demokrasîya dinya çin a.''