Heyetêkê Îdareyê Xoserî yê Rojawanê Kurdîstanî wekîlanê Parlamentoyê Ewropa û komanê parlamentoyî de dest pê pêvînayîşan kerd. Heyetê Îdareyê Xoserî Temsîlkarê Ewropa Ebdulkerîm Omer, Hemserekê HDPyî Cahît Kirkazak, Temsîlkaranê DEM Partî yê Ewropa Eyup Doru û Faîk Yagizayî ra yeno pê.

Heyetî vizêr hêverî Koma Çepe de pêvînayîş kerd. Tîya de Ebdulkerîm Omerî derheqê hêrişanê vera Rojawanî û Sûrîye, tehlukeyê DAÎŞî û rewşa herême de agahîyî dayî. Omerî Koma Çepe ra waşt ke wa heyetêkî bi lezî bişawa Rojawanî. 

Omerî vist vîrî ke dewleta tirke paştî danê DAÎŞî coka herême de tehlukeyê DAÎŞî nêqedîyeno. Omerî vat ke ê do heta peynî vera hêrişan Rojawanî bipawê û waşt ke welatê Ewropa zî vera hêrişan têbigêrê.

Omerî cewab da persanê wekîlanê Fransa, Elmanya, Swêd, Danîmarka, Yewnanistan û Portekîzî yê serê serebûtanê Îdareyê Xoserî û serebûtanê peyênan. 

Wekîlan zî pare kerd ke girîng o ke Îdareyo Xoser ê Rojawanî bipawîyo.

Heyet ewro zî do pêvînayîşan rê dewam bikero.