Dewleta tirke ya îşxalkere 23ê nîsane de vera Zap, Metîna û Avaşînî dest pê operasyonê giranî kerdbi û operasyon de çekê kîmyewî şuxilnabî. Operasyon raştê xeylêk nêrazîbîyayîşan ame û şarî seba ke Rêxistina Qedexekerdişê Çekan ê Kîmyewîyan (OPCW) herême de cigêrayîş bikera çalakîyî kerdbî.

Heyetê îngilîzî zî 28ê sibate-8ê adare de Herêma Kurdîstanî ya Federale zîyaret kerde û şuxilîyayîşê çeka kîmyewîye ser o cigêrayîşî kerdî.

Edîtorê Morning Star, Defend Kurdistan Initiative UK Steve Sweeney; Endamê Heyetê Rayberdişî yê Federasyonê Pêroyî Andi Kocsondi; rojnameger û nuştox John Hunt, endama verêne ya Partîya Karkeran Parlamentoyê Julie Ward, Sekreterê Komîteya Rayberdişî ya Federasyonê Sendîkayan û Sendîkaya Karkeran John McGowan, Şêwirmendê Sendîka û Wezîfedarê GMByî Bert Schouwenburg û rojnameger Mylene Sauloy heyet de ca girewtêne.

Heyetî eşkerayîya xo de veng da ke wa Erdogan sûcanê şerî ra bêro muhakemekerdene û Tirkîya peynîya operasyonê leşkerî yê 11 mengî bîyara. Eşkerayîye de bale ameye antene hêrişanê Tirkîya yê vera Şingal û Mexmûrî ser û ame parekerdene ke Tirkîya Başûrê Kurdîstanî de zî çekê kîmyewîyî şuxilnayî. Heyetî bêvengîya OPCW û rêxistinanê bînan ê mîyanneteweyîyan şermezar kerde û waşt ke cade OPCW heyetêk bierşawo herême.

Heyetî pare kerd ke Erdogan versîyono newe yê Saddam Huseynî yo û ard ziwan ke Erdogan armanc keno ke pêro kurdan çin bikero. Heyetî vat: ''Ma destûr medê ke Qirkerdişê Helebçe dibare bibo. Ganî Îngilîstan, Almanya, Amerîka û Yewîya Ewropa cade Tirkîya rê rotişê çekan vindarnê. Wa Erdogan sûcanê xo yê şerî ra bêro muhakemekerdene. No do seba kurdan bibo gamêka ver bi edaletî.''