Wan de bêkarîye her ke şina zêdîyena û semedo ke wareyî qedexekerde yê heywankarî zî hêdî hêdî qedîyena. 

Par Roşanê Qurbanan de heywanê qijî 2-3 hezar lîra, heywanê pîlî zî 10-20 hezar lîra bîyî. La emser heywanê qijî 5-6 hezar lîra û heywanê pîlî zî 50-70 hezar lîra yê.

Bazirganê heywanan Zekî Karayî vat: ''Merdimî bêkar ê, xizan ê. Coka senî do bieşkê heywanan sere bibirnê? Verê cû rewşe hîna hol bîye la emser rewşe zaf xirab a. Vaya heywananê qijan bîya hîrê qatêre.Kîloyêkê goştî bîyo 250 lîra. Çew nêeşkeno heywanî bihêrîno. 21 serrî yo ez tîya de kar kena la qetî sey nika nêbibi. Tîya herêma heywankarîye û zîretî ya. Coka ma neçare yê ke heywanan weye bikerê. La sey verê cû qezencê ma çin o.''

Heywankar Mehmet Çaçurî vat: ''Mazot zaf vay o, mesrafê ma zaf ê. Ma hînî şiwaneyan nêgênê. Zaf merdimî neçare mendî ke heywananê xo biroşê. Seba ke şar de pere çin o, nêno heywanan nêhêrîno.''

Heywankar Halîl Çîçekî ard ziwan ke bazarê heywanan hende xirab nêbibi û vat: ''Pere çin o. Nika şar pêrîşan bîyo. Roşan ho yeno, tay merdimî bi deynan heywanan hêrînenê û nêeşkenê pere bidê. Ez bi taybetî Erdîş, Mûradiye, Payîzava û cayanê bînan ra heywanan ana û xîret kena nînan biroşa. La qewetê çewî çin o ke heywanî bihêrîno.''

Îhsan Aslanî vat: ''Goreyê zem û krîzî ra heywanî ma zaf ercan ê la seba ke şar de pere çin o nêeşkeno heywanî bigêro.''