Koyanê Başûrê Kurdistanî de, hemverê hêrişanê îşxalî yê dewleta Tirkî de Hêzê Xopawitişî yê Başûrê Kurdistanî awankerdişê xo îlan kerdibi. Başûr de xeylî partî, organîzasyon û organanê weşanî yê ke pabesteyê nê partîyan ê de hêzanê xopawitişî ser o munaqeşeyî ameyî kerdene.

 Naye ser o hetê Hêzê Xopawitişî yê Başûrê Kurdistanî ra eşkerayîyêka newî amî dayene. Eşkerayîye de ame vatene, “Ma, ciwanê Badînan û Bradostî, xo sey hêzê xopawitişî hemverê îşxalê Bradostî û herême de organîze kerd.”

 Eşkerayîye de ca dîya nînan:

“Ma, sey ciwanê Bradostî, sere de eşîretê ke Bradost de yê, roşinvîr û nûştoxî veng danê her kesî ke hemverê nê îşxalî de doşê xo bide doşê ma. Qaso ke eşkayî ma rê past^ibidê. Xusûsen eşîretê ke wareyê Bradostî de ciwîyenê û tim rastê îxanetî yenê ma înan ra nê pawenê. 

 Sey grûbêka ciwanan a Badînan û Bradostije seba ke ma hemverê hêrişanê herêma xo de vinderê û îşxalî bin fînê ma xo sey hêzê xopawitişî organîze kerd. Amacê ma pawitişê şarê xo û destkewteyanê ci yo.

 Badînan û Bradost de çi heyf ke tayê kesê ke eşîretan ra yê hemverê Kurdan de dewleta Tirkî ya îşxalkare dir hemkarîye kenê. Îstîxbarat danê dewleta Tirkî. Bi her çîyê xo hemverê şarê ma de dişmenî dir hemkarîye kerdê. Ma nê kesan nas kenê û ma zaf rind zanê ke ê wazenê se kerê. Ganî ê fek dişmenîya hemverê eşîretan û şarê ma ra vera bidê û pîya bi şarê ma tewrê mucadeleyê hemverê îşxalî bibê. Ganî no zî bêro zanayene ke ma hemverê tu hêzêkê Kurdî de awan nêbî.

 Hemverê îşxalî de ma veng danê pêşmergeyanê ke sey bira û pîyê ma yê û 40 serrî ra vêşêr seba Kurdistanî mucadele kerdê, wa bêrê ma pîya xover bidê. Ma domanê nê erdî yê xas ê. Ma wazenê ke erdanê xo hemverê îşxalî de bipawê. 

 Ma do bi îradeyê xo yê cewherîyî, xoverdayîşê xo û destekê şarê xo mucadeleyê xo bidê û îşxalkaran erdanê xo ra bikerê teber!“