Merkezê Îrtîbatî û Çapemenîye yê HPGyî  derheqê hêrişanê dewleta tirke û çalakîyanê gerîlayan de eşkerayîye daye û nê vatî:

“Hêrişê dewleta tirke yê vera Rayber Apo, şar û Gerîlayanê Azadîye yê Kurdîstanî bêmabên dewam kenê. Sey şarê ma û dostanê ci gerîlayî zî vera tercrîdê Îmraliyî hêrsbîyaye yê. Hêzanê ma Xakurkê de bi çalakîyanê koordîneyinan bi hewayêkê hemwaxtî derbeyê giranî dayî dişmenî ro. 18 îşxalkerî ameyî cezakerdene. Nê çalakîyan de hemrayê ma Seyît, Amara û Azad yê ke bi ruhê fedayîyî şîyî dişmenî ser, şehîd bîyî. Ma do peyra nasnameyanê hemrayanê xo eşkera bikerê.

Detayê çalakîyanê hêzanê ma û hêrişê artêşa tirke ya îşxalkere wina yê:

Herêma Xakûrkê

Herêma Kolîtî de leşkerê tirkan hetê hêzanê ma ra gerîyayî binê kontrolî. 15ê hezîrane de Îşxalkerê ke ver bi Girê Şehîd Şahanî şîyênî hetê hêzanê ma ra ginayî xapî ro. Îşxalkerî di hetan ra bi çekanê ferdîyan û bombayanê destan ameyî pirodayene. Badê pêkewtişê 15 deqayan  hêzê ma şîyî cenazayanê dişmenî ser. 18 îşxalkerê ke ameyî cezakerdene ra yew zî payeberz bi. Rixmo ke cenazayê ci tede erdî bî, artêşa tirke herême bi obus, tanq û teyarayanê şerî da bombayan ver. Nê bombardumanî de hemrayê ma Seyît bi giranî birîndar bi û şehîd kewt. Wextê peyserantişî de hemrayê ma Amara û Azad zî tewrê kerwanê şehîdan bîyî. 

Pîya bi na çalakîye bi hewayêkê hemwextî Girê Şehîd Şahan, Girê Şehîd Axîn û Girê Şehîdî îşxalkerî bi çekanê giranan ameyî pirodayene. Tîya hûmara merdeyan safî nebîye. Dewleta tirke çar rey bi helîkopteran merde û birîndarê xo kiriştî. Nê çalakîyî vera tecrîdê Îmraliyî ameyî kerdene.

Herêma Zapî

15ê hezîrane de Warê Xoverdayîşî yê Girê FMyî de îşxalkerî hîrê rey pê çekanê giranan ameyî pirodayene.

Bombarduman 

15 û 16ê  hezîrane mewzîyê xoverdayîşî yê Warê Xoverdayîşî yê Sîda di rey pê çekanê qedexeyan dîyayî bombayan ver. Eynî rojan de warê Girê Çarçel, Serê Metîna, Golka çar rey û warê Deşta Kafya, Şêranê û Kanî Sarkê yê Garê hewt rey pê teyarayanê şerî dîyayî bombayan ver. Warê Xoverdayîşî yê Sîda û Şehîd Delîlî, Girê Cûdî, Girê Amedîyê û Girê Baharî yê Zapî,  Warê Xoverdayîşî yê Girê Hakarî yê Metîna, Girê Kolît, Girê Şehîd Kamuran, Girê Şehîd Heqî yê Xakurkê û dormeyê Çemê Lolanî 227 rey pê obus, tanq û çekanê giranan dîyayî bombayan ver. ”