Fermandaranê YJA Starî ra Sozdare Cûdî şehîde bîye

HPGyî nasnameyê Fermandara Eyaletê Mêrdînî ya YJA-Starî Sozdare Cûdîya ke Bagok de şehîde bîye eşkera kerd û vat: ''A têkoşînê xo yê 22 serrî de warê Gerîlatîya Modernîteya Demokratîke de bîye fermandaranê mîsalan ê YJA-Starî ra yewe.''

Merkezê Îrtîbatî û Çapemenîye yê HPGyî nasnameyê Fermandara Eyaletê Mêrdînî ya YJA-Starî Sozdare Cûdîya ke Bagok de şehîde bîye eşkera kerd. Eşkerayîye wina ya:

''8ê gulana 2021î de warê Şehîd Merwanî yê Bagokî yê Mêrdînî de bombardumanê artêşa tirke ya îşxalkere de embaze Sozdare Cûdî şehîde bîye. Aye têkoşînê xo yê 22 serrî de erjê azadîye kesayetê xo de temsîl kerdî û bîye milîtananê tewr erjîyayeyan ê Rayber Apoyî ra yewe. Embaze Sozdare cuye û şer de tim xeta fedayîtîye de bîye wayîra tewrbîyayîşêkî û warê Gerîlatîya Modernîteya Demokratîke de bîye fermandaranê mîsalan ê YJA-Starî ra yewe.

Nasnameyê embaze Sozdare wina yo:

Nameyê Qodî: Sozdare Cudî

Name û Peyname: Menale Yusuf

Cayê Bîyayîşî: Qamişlo

Maye-Pî: Hacere – Îbrahîm

Tarîx û Cayê Şehadetî: 8ê Gulana 2021î / Mêrdîn

Embaze Sozdare Qamişlo de dadîya xo ra bîya. Embaze Sozdare cuya PKKyî ra ber cuyêka bîne qebul nêkerde û vera Komployê Mîyanneteweyî tewra gerîlayan bîye. Embaze Sozdare tim xeta milîtanîya PKKyî de bîye isrardar û xeylêk waranê cîyayan de, binê pêro şert û mercan de têkoşîn kerd. A tim pê cidîyetî nêzdîyê wezîfeyanê xo bîye û serkewtişî ra ber çîyêk xo rê esas nêkerd.

Embaze Sozdare verî pê xebetanê komelkîyan tewra têkoşînî bîye. Embaze Sozdare pê kesayetê xo xeylêk kesî îqna kerdî ke cepheyê PKKyî de têkoşîn bikerê. Embaze Sozdare 2003 de verê xo da koyanê azadan. Embaze Sozdare tim tewr vernî de ca girewt û pê cewsaret û kesayetê xo wextêkê kilmî de bîye fermandare. Aye tim xo aver berd û bîye milîtanêka marîfetîne ya Apogîre. Embaze Sozdare 2018 de Akademîya Şehîde Bêrîtane de wezîfe girewt û tîya de embazê xo yê cinîyî perwerde kerdî. Embaze Sozdare dima sey Fermandara Eyaletê Mêrdînî ya YJA-Starî derbazê Vakurê Kurdîstanî bîye. A bîye sembolanê tewr girîngan ê fedayîtîya cinîyan ra yewe.

Ma sere de keyeyê ci yê ercîyayeyî rê pêro şarê Qamişloyî û şarê welatperwerî yê Kurdîstanî rê serweşîye wazenê. Ma şexsê embaze Sozdare de pêro şehîdanê xo rê perwerîya xo dibare kenê û soz danê ke se beno wa bibo ma do qetî xeyalanê înan bîyarê ca.''