Merkezê Îrtîbat û Çapemenîye yê HPGyî derheqê hîrê gerîlayanê ke Botan de şehîd bîyî de eşkerayîye daye û nê pare kerdî:

''Adara 2017î de dewleta tirke hêrişê warê Botanî kerd. Netîceya hêrişan de hemrayê ma Rênas, Koçer û Rustem ê ke bi hewayêkê qehremankîyî têkoşîn kerdêne, tewrê kerwanê şehîdan bîyî. Hîrêheme embazê ka yê ke sey mîlîtananê nimûneyan ê gerîlatîya modernîteya demokratîke tarîx de cayê xo girewt, ma înan bi hurmetî yad kenê û soz danê ke ma do waştişanê  înan ê azadîye bîyarê ca.

Nasnameyê embazanê yê şehîdan wina yê:

Hemrayê Rênas bajarê Kotolî yê Rojhilatê Kurdîstanî de ameyo dinya û pê kulturê welatperwerîye bîyo pîl. Hemrayê ma Rênas badê kompoloyê vera Rayber Apoyî cade wazeno tewrê sefanê gerîlayan bibo la seba ke serrê ci qij ê nêgerîyeno mîyanê gerîlayan. La no waştişê xo canêvedeno, semedê gerîlatîye keno xo çeng. Serra 2001î de tewrê gerîlayan beno. Warê Xinerê de gerîlatîye û cuya PKKyî museno û dima warê Qendîlî de tecburê keno pêser. Na çarçewe de 2003 de verê xo dano Vakurê Kurdîstanî. Kato û Elkê yê warê Botanî de serrêke xebate rayra beno. 2004-2005 de warê Garîsa de falîyet rayra beno û seba ke pêkewtişêk de birîndar beno ravêreno Herêmanê Pawitişî yê Medya. Badê tedawî Akademîya Mahsum Korkmazî de perwede vîneno û sey fermandarî mezun beno. Dima ra wextêk Zap de maneno û 2007 de reyna verê xo dano Botanî. 2009 de pêkewtişêk de birîndar beno û şino warê Besta.  Rixmo ke di rey birîndar bîyo çirey peyser game nêerzeno.Hêrsê ci yê vera dişmenî zêdîyeno û dahîna qerardar têkoşîn keno. Bado ke biney beno weş warê Şehrîbanî ya Besta de sey fermanarê tîm û takimî wezîfe geno. Besta de 4 serrî pratîkê zehmetî yê şerî rayra beno. 2014 de sey fermandarê herême şino Garîsa û heta 2016î  Garîsa û Herekol de wezîfeyê xo yê fermandarîye bi serkewtişî ano ca. 2016-2017 de fermandarîya herême ya  Besta keno û wisarê 2017î de tewrê kerwanê şehîdan beno.Ganî ciwanê Kurdîstanî çeka fermandarê qehreman Rênas Mahabadî erdî de meverdê û tewrê gerîlayan bibê.

Hemrayê ma Koçer Hezexê Şirnexî de ameyo dinya û keyeyêko welatperwerî de bi kulturê koçberîye bîyo pîl. Rîyê hêrişanê dewlete ra keyeyê ci serranê 90yan de bar kerdo şîyo Nisêbîn. Hemrayê ma Koçerî mîyanê şerî de raştîya dişmenî fam kerda û vera ci hêrsê ci tim zêdîyayo. Hemrayê ma Koçero ke tewrê serhilanê 2006î yê Vakurê Kurdîstanî bîyo, esîr kewto destê dişmenî û şeş mengî zîndan de mendo. La ey zîndan zî açarnayo cayê têkoşînî, tîya vera dişmenî milê xo çewt nêkerdo. Badê zîndanî dest pê unîversîte kerdo û tîya zî xebata ciwanan rayra berde û 2009 tewrê sefanê gerîlayan bîyo. Hemrayê ma Koçerî ke tewrbîyayîşê gerîlayan sey newera bîyayîyî girewtêne dest, xo her hetî ra lezabez aver beno û beno gerîlayêko serkewte.

Hemrayê ma Rustem Erzirom de ameyo dinya. Keyeyê ci rîyê zextanê dewleta ra mecbur mendo ke bar bikero şiro metropolan la çirey kulturê xo ra dûrî nêkewto. Hemrayê ma Rustemo ke keyeyo winayên kedkar û welatperwer de bîyo pîl badê vengdayîşê serferberîye yê Rayber Apoyî yê 2013î verê xo dayo koyanê Kurdîstanî. Perwerdeyê xo yê verênî warê Xakurkê de girewto. Serranê 2014-2015 gama ke DAÎŞ pê paştdayîşê dewleta tirke hêrişê vera Rojawan û Şingalî kerd o zî semedê pawitişê şarê xo têkoşînê Şingalî de cayê xo girewto. Bado ke Şingal çeteyanê DAîŞî ra yeno xelisnayene agêrayo koyanê azadan ê Kurdîstanî. Wazeno Vakurê Kurdîstanî de vera dewleta tirke têkoşîn bikero û ravêrno uca. Herama Botanî de xeylêk çalakîyanê serkewteyan de serkêşîye kerde.

Ma sere de keyeyanê erjayeyan ê hemrayanê xo Rênas, Koçer û Rustemî heme şarê welatperwerî yê Kurdîstanî rê serweşîye wazenê. Ma soz danê ke ma do waştişê şehîdanê xo yê Rayberîya Azade, Kurdîstano Azadî bîyarê ca.''