Merkezê Îrtîbatî û Çapemenîye yê HPGyî nasnameyê 4 şehîdanê Wanî eşkera kerdî  û nê pare kerdî:

''6ê çeleyê 2017î de prosesê kampa zimistanî de bi tewirêkê bêtalîhî vewrês ame war û hemrayê ma Xeyrî, Eşref, Dilda û Dilşad tewrê kerwanê şehîdan bîyî. Ma serrgêra şehadetê hemrayanê xo de înan bihurmet yad kenê.

Nasnameyê embazanê ma yê şehîdan wina yê:

Hemrayê ma Xeyrî Bedlîs de ameyo dinya û bi kulturê welatperwerîye bîyo pîl. Serranê 90an de keyeyê embazê ma Xeyrî rîyê zextê dişmenî ra mecbur mendo ke metropolanê tirkan rê bar bikero la rixmê heme polîtîkayanê asîmîlasyonî hemrayê Xeyrî çirey ercanê kurdîtîye ra dûrî nêkewto. Tîya raştişîya dişmenî dahîna rind fam kerda û 2004 de verê xo dayo koyanê Kurdîstanî. Tewrbîyayîşê gerîlayan ra heta ke ravêrt warê Botanî xeylêk xebatanê stratejîkan de ca girewt û tim waştêne şiro Vakurê Kurdîstanî. Hemrayê ma Xeyrî 2009 de şi Botan tîya heme prosesanê hamlekî de bi qerardarîye û fedakarîya pîle sey serkêşî ca girewt û wezîfeyê xo bi serkewtişî ardî ca. Bitaybetî wextê Xoverdayîşanê Xoîdarekerdişî de bi hewayêkê fedayîyî xeylêk waran de hekîmîyetê dişmenî şikit. Hemrayê ma Xeyrî gerîlatîya xo ya 21 serran de têkoşînêko serkewte rayra berd û bi qezayêkê bêtalîhî şehîd kewt. Ma do şexsê hemrayê ma Xeyrî de xeyalanê şehîdanê xo bîyarê ca.

Hemrayê ma Eşref Elbakê Wanî de ameyo dinya û dormeyêkê welatperwerî de bîyo pîl. Hema domanîya xo ra partîya ma PKK nas kerda û binê tesîrê ci de mendo.  Bitaybetî wextê Şorişê Rojawanî de nizdî ra dîyo ke partîya ma semedê şarê ma çi îfade kena û  şerê vera DAÎŞî de cayê xo girewto. Prosesê şerî de bi cesaret û fedakarîya xo bale anta xo ser. Hemrayê ma Eşrefo ke bi tewirê fedaîyî şer kerdêne xeylêk rey birîndar bîyo. Badê şerê vera DAÎŞî 2016 de verê xo dayo koyanê Kurdîstanî ke tim xeyalê ci kerdêne. Hemrayê ma Eşref bi tecrubeyanê şerê Rojawanî demê kilmî de bîyo gerîlayêko serkewte û verê xo dayo warê Botanî. Hemrayê ma Eşrefî mîyanê xeylêk çalakîyanê serkewteyan de ca girewto û bîyo wayîrê pratîkê serkewteyî.

Hemrayê ma Dilda Wan de ameyo dinya keyeyêkê welatperwerî de bîyo pîl. Seba ke hetê ekonomî ra paştî bido keyeyê xo metropolan de xebityayo û zîhnîyetê dewleta îşxalkere dahîna nîzdî ra dîyo. Hemrayê ma Dîld seba ke vera polîtîkayanê asîmîlasyon, înkar û îmha yê dewlete şer bikero 2014 de warê Botanî de tewrê sefanê gerîlayan bîyo. demê kilmî de bi eşqê pîlî semedê pawitişê erd û şarê xo dest pê têkoşînî kerdo. Xo hetê leşkerî û îdeolojî ra lezabez aver berdo û bîyo gerîlayêko serkewte. Ercê ke hemrayê ma Dîldayî bi karekterê xo yê mîlîtanî afernayî do tim mîyanê têkoşînê ma de biciwîyê û rayîrê ma roşn bikerê.

Hemrayê ma Dilşad Wan de ameyo dinya û bi tradîsyonê welatperwerîye bîyo pîl. Hema domanîya xo ra hem hêrişê dewleta tirke yê vera kurdan û hem zî têkoşînê azadîye yê kurdan rê şahîdîye kerda. Hemrayê ma Dilşado ke serranê xo yê ciwanîye de tewrê sefanê şorişî bîyo pêro emrê xo semedê têkoşînî dayo. Roja tewrbîyayîşî ra waranê têkoşînî yê tewr zehmetan mendo û bi îradeyê xurtî semedê embazanê xo bîyo çimeyê hêz û moralî. Hemrayê ma Dîlşad bi cuye, vindetiş, tewrbîyayîş û pratîkê xo bîyo mîlîtanêko serkewte yê PKKyî. Hemrayê ma Dilşad do pîya bi şehîdanê ma yê bêmergan tim rayîrê ma roşn bikero.

Sere de keyeyê erjîyayeyî yê hemreyanê ma Xeyrî, Eşref, Dîlda û Dilşadî  yê ke semedê şarê xo emrê xo da şorişî, wa sereyê heme şarê welatperwerî yê Kurdîstanî weş bo.''