Endamê Komîteya Rayberdişî ya PKKyî Duran Kalkanî Bernameyê Taybetî yê Medya Haber TVyî rê qisey kerd û ercnayîşê girîngî kerdî.

Qiseykerdişê Kalkanî ra beşêk wina yo:

''Îmrali de vera tecrîdî xoverdayîşê Rayberîye dewam keno. Tecrîdê Îmraliyî mojneno ke vera Rayber Apoyî komployêko senîn yeno kerdene û no komplo hêrişêko global o. Serê nê komloyî ra 23 serrî derbaz bîyî. Hende xoverdayîş ame kerdene la çîyêk nêvurîya. Rayber Apoyî dêsê Îmraliyî kerdî parçe-parçe. Berê Îmraliyî wina girewte yê ke nefesê Rayber Apoyî nêno. La Serekkomarê dewleta tirke, serekê partîyan û muxalefet nameyê ey ser o qisey kenê. Şarê kurdî, sîyasetmedarî zî vera ney nêrazîbîyayîşê xo mojnenê. Ganî her kes vateyê xo, bi xo vajo. Eke ê pabeyê ci yê ke têkoşînê ma yê vera tecrîdî biqedo hema zaf pawenê. Ti hem tecrîdî anî ca hem zî wurzenî Rayber Apoyî ser o qisey kenî. No mojneno ke sîstemê Îmraliyî sîstemêko senîn o.  Ê nêeşkenê nameyê Rayber Apoyî qisey bikerê. Seba ke Rayber Apo qisey mekero înan berê Îmraliyî qefilnayî. 

Ma hê dekewenê serra 23. ya Komployê Mîyanneteweyî. Şarê ma komployî rê vat 'Roja Reşe', Rayberîye vat 'Qirkerdişê Kurdan.' Ez xoverdayîş û têkoşînê Îmraliyî yê Rayber Apoyî selam kena. Komplo 9ê teşrîna verêne de bi armancê îmhaya Rayberîye dîya desstpêkerdene. Seba ke ê ser nêkewtî 15ê sibate de Rayberîye teslîmê Tirkîya kerde. 23 serrî yo vera îmha û sîstemê tecrîd û îşkenceyî têkoşîn yeno kerdene. Yanî verî verê îmha, îdam û polîtîkaya pûçkerdişî ame girewtene. Nika ê vanê qey pê qirkerdişî, qelskerdişî, israr û dergkerdişî çin kenê. Do nêeşkê!Gandarbîyayîşê Rayberîye yo Hîrêyîn qewimîya. No zî raştîya Rayberîya kurdan vurnaye Rayberîya bindestanê dinya. Game bi game vila beno û nika ra eşkera yo ke do bibo serebûto tewr pîl ê seserra 21. 

Qaşo Amerîka Bexdadî û Abdullah Qardaş werte ra wedaritî. O çax no DAÎŞ senî reyna vejîyeno werte? Nê wird servergî zî erdê Tirkîya de kişîyayî. Tîya de mesuldarîya dewleta tirke, mesuldarîya hukmatê AKP-MHPyî çin a? Qet vengê xo nêkenê. Dewleta tirke zerar dana têkoşînê vera DAÎŞî. Hêrişê vera Hesekê seba çinkerdişê Îdareyê Xoserî û îşxalê herême bi. Peyê nê hêrişî de tay hêzî estê. Înan xo baş amade kerd.  Dewleta tirke paştî daya nê hêrişî. Ganî her kes naye bizano. Êyê ke vanê vera DAÎŞî yê wa o çax vera hevalbendanê DAÎŞî zî têbigêrê. 

DAÎŞî 20ê çeleyî de hêrişê Hesekê kerd û bin şi. Dewleta tirke zî 1ê sibate de hêrişê Mexmûr û Şingalî kerd. 11 rojan dima. Seba ke DAÎŞ bin kewt dewleta tirke hêriş kerd û waşt qesasê DAÎŞî bigêro. Hêrişê dewleta tirke û hêrişê DAÎŞî hêrişê vera merdimîye yê. Ê kurdî ça de bihêz bê hêrişê ci kenê.

Ê PDKyî zî şuxilnenê. Ça de hêrişê vera kurdan yeno kerdene îdarekarê PDKyî zî uca de asenê. Gelo Nêçîrvan Barzanî kurdayetîye ra çîyêk fam nêkeno? Şarê kurdî do hesabê ney biperso. Dewleta tirke bi çi heqî hêrişê sivîlan kena? Dewleta tirke vana a hêrişê hêzanê leşkerîye kena. Ganî no nêzdîbîyayîş bêro rexnekerdene û mehkumkerdene. 

Şarê kurdî vera hêrişan her ca de nêrazîbîyayîşêko pîl da, wa wina dewam bikero. Dewleta tirke wazena bi rayîrê nê hêrişan, bi îxbar û îstîxbaratê PDKyî, bi teknîkî şarê kurdî qetil bikera. Ganî na rewşe de xoverdayîş û rêxistinîye hîna bi zanayîş û afernayoxî bêrê kerdene. Vera Mexmûr, Rojawan û Şingalî hêrişê winasênî zaf ameyî kerdene. La ê nêeşkayî îradeyê şarê Rojawan, Şingal û Mexmûrî bişiknê. Înan xo ver da û do xo ver bidê.''