Endamê Komîteya Rayberdişî ya PKK’yî Dûran Kalkanî, Sînanê Sor (Alî Aktaş), Serhat Amanos (Emrûllah Dûrsûn), Navdar Sînegîr (Mîkaîl Ozdemîr), Serhat Şafak (Vehîp Tekîn) û Şiyar Faraşîno (Celal Ozturk) ke 21'ê Adare de hêrişê hewayî yê dewleta Tirkî de şehîd bîyî bi vîr ardî û vat ke do vîrameyîşê înan açarnê hêz, organîzebîyayîş û mucadeleyêkê pîlî.

 Kalkanî vat qetilkerdişê 5 hemrayanê înan ê Qendîlî û tewr peynî qetilkerdişê Dîyar Xerîbî bi heman hawayî yo û vat ke hêrişî bi zanayîşî, bi hawayêkê organîzekerdeyî û plankerdeyî ameyî kerdene.

‘Hêzanê Cayîyan ra Paştî Gênê’

Kalkanî bale ante ser ke ganî bêro dîyene TC, MÎT bê hetkarîya herême nêeşkeno Qendîl de hêrşanê winayênan bikero û vat, “Ma waşt nê fam bikerê. Bi na wesîleye ma wazenê reyna bipersê; tirêm çarçewaya peymananê bi zanayîşî û plankerdeyî yenê kerdene, yan zî mîyanê înan de tayê kesî estê ke MÎT’î rê ajanîye kenê? Ma wazenê nê bizanê. Ma nêvanê ke îdareyê Başûrê Kurdistanî, PDK û YNK bi temamî hemkarê TC’yî yê û ê bi hawayêkê plankerdeyî kenê. Beno ke mîyanê înan de organîzebîyayîşêko nimite yê MÎT’î estbo, ke hemkarîye keno.”

 ‘Mîlîtano Pîl, Şexsîyetêko Qehreman Bi’

Kalkanî qalê şexsîyetê cangorîyan kerd û ard ziwan Alî Aktaş gama ke PKK awan bi têkilî ci dir ronaye, serra 1978 de tewrê ci bi û vat, “Emrê ciwanî de rastî dîye; rastîya Rayber Apoyî, rastîya azadî û estbîyayîşê Kurdan û PKK’yî dîye. Bi heme hêzê xo xo bi ci girêda û mîyanê 40 serran de çar hetanê Kurdistanî de mîyanê her tewir mucadeleyî de ca girewt. Şexsîyetê xo de mîlîtanêk û şexsîyetêko qehreman aferna.”Kalkanî ard ziwan ke o bi hemrayê Egîdan, Berîtanan, Zîlanan, Erdalan û hemrayîya bi hezaran şehîdan kerde.

‘Her Gure û Mesuldarî Bica Arde’

Kalkanî ard ziwan ke Serhat Varto serra 1991 de Gimgim de tewrê refanê mucadeleyî bîyo û vat, “Demêko derg mîyanê gerîlayan de gure û mesuldarîya xo bica arde. Mîyanê şertanê tewr çetinan de bi hawayêkê aktîfî tewrê mucadeleyê gerîlayî bi. Şerwanîye ra heta fermandarîya eyaletî heme gureyî bica ardî.”

‘Bitesîr û Afernayox Bi’

Kalkanî ard ziwan ke Navdar serra 1993 de Xerzan ra tewrê refanê gerîlayan bîyo û mîyanê şertanê çetinan de Amed de gerîlatî kerde. Kalkanî vat ê her derece de fermandarîya gerîlayan kerda û vat, “Xebatanê sîyasî-cimatkîyan de bi mesuldarîye gureyî bica ardî. Xebata ma ya newe ra awanbîyayîşî yê organîzasyonî de zî rolê ê estbi. Birastî zî bitesîr bi, afernayox bi. Loma her cayo ke tede bi xebatêka afernayoxe kerdêne. Demêko derg Komîteya Têkilîyanê Teberî de bi.”

‘Abîdeyêka Merdimîye Bîyî’

Kalkanî vat, “Hemra Serhat Şafak wextêko derg mîyanê gerîlayan de mend, xeylî wareyan de gerîlatî kerde û xeylî gureyê cîyayî bica ardî. Pîya bi gerîlatîye xebatê îdeolojîkî kerdêne. Teberê welatî de zî xebate kerde. Kerd ke her ca de mîlîtanîya partîye temsîl bikero.” Kalkanî vat ke hemrayê înan Şîyar zî newe tewrê partî bibi û vat rixmê nê de wayîrê enerjî û coşê ciwananê dewrê neweyî bi. Kalkanî peynî de vat, “Birastî zî înan ra her yew abîdeyêka merdimîye bî, cimatêkê bawerîye bî, rastîya cuya azade bî.”