Endamê Komîteya Rayberdişî ya PKKyî Duran Kalkanî nîşan kerd ke 7 ra heta 70 serrî ganî komel şerwan bo, xo bipawo û vat “ganî cuya ma ya aborî, komelkî, kulturî bingeyê xopawitişî ser o bo. Ma do xo bingeyê îdeolojîk, sîyasî, leşkerî ser o perwerde bikê, organîze bibê. Ma do sîstemê xo yê xopawitişî bîyarê were û bê ke bendê kesî bimanê ma do keye, dewe, tax, kolan, qeza, şaristan, hêrema xo bipawerê. Eke lazim bî ma do bi qehremanî şer bikê û xo feda zî bikê.”

Endamê Komîteya Rayberdişî ya PKKyî Duran Kalkanî bi wesîleya serrgêra 41. a ronayîşê PKKyî cewabê persanê ANFyî da. Kalkanî beşê diyînî yê pîyaqiseykerdişî de bi taybetî kêmasîyê mîyanê 10 serranê peyênan ê xoverdayîşî ser o qisey kerd û na rewşe nirxnaye.

Kalkanî nîşan kerd ke seba ke mîyanê 10 serranê peyênan de bi Stratejîya Şerê Şarî yê Şorişgerî xoverda, nêeşkayî sîyaset û zîhnîyetê faşîst û qirkerî bin bifîyê û vat “rasta zî eke ma bieşkayêne vurenayîşê stratejîkî bi lez bikerdêne, gore Stratejîya Şerê Şarî yê Şorişgêrî xo organîze bikerdêne û şerê xopawitişî her ca de bikerdêne nika îdareyê Erdoxanî nêmendîbî. Seba ke ma nêeşkayî naye bikerê emrê îdareyê Erdoganî bî derg. Nika keno ke hîna zaf gal bikero. Ma bala xo danîme ser, galê Başûrî keno, Galê Rojawanî keno. Rastîye de bê ke bikewo nê cayan îmkan estbî ke Vakur de îdareyê Erdoganî bêro rijnayene.”

Kalkanî wina dewam kerd “Na nuqta de ganî merdimî di çîyanê bînanzî bîyarê ziwan. Cinî, ciwan, karker, kedkar, pêro beşê komelê kurdan ganî naye baş bixanê; çareserîya mesela kurdan asan nîya. Dinya hetê hêzanê pîlan ra ameya perekerdene. Sîstemê kolonyalîstî Kurdîstan parçe kerdo, estbîyayîşê kurdan qebul nêkeno û wazeno înan çin bikero. Sîstemêko qirker o û rewşêka elelede nîya. Seba çinkerdişê estbîyayîşê kurdan komkîştişan keno galanê çinkerdişî keno, asîmîlasyonî keno, demografî vureneno, çar hetê dinya ra merdiman kom keno ano cayê kurdan de ca keno.

'Qirker û Kîştoxan ra Hêvîye Nêna Kerdene’

Kalkanî vat "Tewr manaya vateyê ‘çira Amerîka, Ewrupa, Rûsya ma nêreynrna’ çin a. Înano ke Kurdîstan parçe kerdo, visto nê halî xora ê bi xo yê. Înano ke sîstemo qirker awan kerdo reyna ê bi xo yê. Merdim qirker û kîştoxan ra hêvîye nêkeno. Rastîya tarîxî wina ya. Eke ma wazenê ke estbê û azad bê otaw ganî gore bi na rastîye tevbigerê.”

Kalkanî nîşan kerd ke hêzê înan nê çîyan rê bes keno vat “kurdî qehreman ê, çêr ê, fedekar ê, xoverdayox ê, şerwan ê û eke bi nê hawayî bi hişmendîya xopawitişî xo organîze bikê, eke keye û dewanê xo de her kes bi çeka xo xo organîze biko, eke duşte galan de peyde gaman meerzê ê do qetîyên ser bikew. Ganî komel 7 ra heta 70 serre xo wina organîze biko. Wexto ke galî bîy zî ganî ma cuya xo dewam bikê. Xo pawitiş bi nê hawayî beno. Ganî ma mevajê “wa Amerîka û Rûsya bêrê ma bipawê.”

Nimûne; îşxalkerî nika kewenê Rojawanî. Eşkenê bikewê çekê înan zaf ê. Mavajîme ê xebitnayî û dekewtî. La eke ma uca organîze bê, şew roj ma bide îşxalkeran ra ê nêeşkenê uca vinderê.”

Organîzebîyayîş û Bingehê Xopawitişî Ser o Şer

Kalkanî dîyar kerd ke ganî ê rastîya ke çiman ver de ya baş bivînerê û vat “Azadî bi xopawitişî bena. Xopawitiş hêzê merdimî yo bi xo yo. Merdimî binê pawitişê yewnayî de azad nêbenê. Rewşa winasîye de merdimî tena benê kole. Eke ma wazenê ke azad bê o taw ganî ma xo bipawê. Seba naye zî ganî ma xo bingeyê îdeolojîk, sîyasî û leşkerî de organîze bikê. Estbîyayîşê azdî teberê na yewe de nîyo. Ma ke wazenê ke azad bê ganî ma xo bi hêzê xo bipawê.”