Endamê Komîteya Rayberdişî ya PKKyî Duran Kalkan beşdarê ‘Bernameya Taybet’ ê Medya Haber TV bi. Duran Kalkanî bale ante serê erdlerzê 6ê sibate û vat, ‘‘Wa rehma Homayî qurbanan ser o biba, birîndaran rê zî şîfa wazena. Dejanê şarê Kurdîstan, Tirkîya û Sûrîye zerrî ra hîs kena.’’

Kalkanî seba paştîdayîşê şarî vat, ‘‘Sipasîya her kesî kena ke paştî da yewbînan. Teber ra zî hetkarî ame dayene. La belê tim dewleta tirke ameye esasgirewtene. Xora polîtîkayê dewlete yê hemverê kurdan de dîyar o. Nêzdîbîyayîşê AKP-MHPyî yê vera kurdan yeno zanayene. Îqtîdarê AKP-MHPyî metodê xo yê faşîst û çinkerdişî nê erdlerzî de bi heme hêzê xo dewam keno. Hewl danê ke vernîya hetkarîyanê komelîyan bidê girewtene’’

Vîrardena Erdlerzê 1976 yê Çaldiranî

Kalkanî Erdlerzê 1976 yê Wan/Çaldiranî ard vîrardene û vat, ‘‘ê wextan de heme bajaran ra 5-10 grûbî şîyî hetkarîya erdlerzî û uca de xebitîyayî. Dîlok ra embaz Hakî şî koordîne kerd. Ê karî ke erdlerzî de ameyî kerdene, peynîya ey de têgêrayîşê ma kerd sey partîyêke.

Duran Kalkanî ard ziwan ke hemverê encamanê giranan ê erdlerzî de ê do bi heme hêzê xo têkoşîn bikerê û vat, ‘‘Seba ke ma encamî sivik bikerê, seba ke ma dejanê şarê xo sivik bikerê, çi hewce bikero ma do bikerê.’’

 ‘Gere şar xo nê sîstemê rantî ra bixelisno’

Kalkanî dîyar kerd ke gere şar qederê xo bîgêro destê xo û xo nê sîstemê rantî ra bixelisno. Xo biresno ê daraxî ke, wa afatê xozayî nêeşîkîyê zirar bidê ci. Îmkanan baş bixebitno, pare bikero û mîyanê keyfweşî de biciwîyo. Hewldayîşê ma seba ney ê. Nê bingeyî ser o ma do hewldayîşanê xo xurtêr bikerê.’’

‘Îqtîdar do hewl bido ke erdlerzî bixebitno û emrê xo derg bikero’

Kalkanî ard ziwan ke Îqtîdar do hewl bido ke erdlerzî bixebitno û emrê xo derg bikero û vat, ‘‘Gere nê çîyî rayîr nêro dayene. Encamê erdlerzî, rîyê îqtîdarîya AKP-MHPyî vet meydan. Maskeya înan arde war û nîşanê her kesî da ke ê çî yê. Nêeşkenê bawerîya kesêkî bi çîyêkî bîyarê. Se bikerê zî êdî nêeşkenê xo bixelisnê. Erdlerz do înan zî bilerzno.’’

 ‘Gere kesêk astengîya AKP-MHPyî nêşinasno’

Dran Kalkanî dîyar kerd ke seba ke bieşkîyê encamanê erdlerzî sivik bikerê, gere partîyê bînî hîna zaf çalak bibê û bi seferberîye bixebitîyê û vat, ‘‘Îttîfaqê Ked û Azadîye hewl danê ke çîyan bikerê. Ê zî erey giranîya babete pêhesîyayî. Reyna karo ke kenê baş o. La yenê astengkerdene. Muxalefet, Îttîfaqê Ked û Azadîye, komeleyî, sazgehê hetkarîyî gere goş nêdê astengîya AKP-MHPyî.’’

 ‘Muhîmîya paştîdayîş û parekerdişê komelî eşkera bîye’

Kalkanî vat, ‘‘Seba nê komelî ez eşkena vaja; rasta zî muhîmîya paştîdayîş û parekerdişî eşkera bîye. Cuya komelkî eşkena paştîdayîşî hîna başêr awan bikera. Yanî ê çîyê berqoqî yê kapîtalîzmî cuye nîya. Gere merdim vera xo nêdo înan.’’

 ‘Seba mexdûran hîna zaf hetkarî lazim a’

 ‘‘Gere her warî ra, çar parçeyan ra û teberê welatî ra seba mexdûranê erdlerzî hîna zaf hetkarîyî bêrê arêdayene. Gere ma nê çîyî bikerê rêxistinîye. Gere ma rasta zî muhîmîya sîstemê damokratîkî, cuya azadîperest û demokratîkî baş bivînê. Gere ma qederê xo xo bi xo dîyar bikerê.

Ez dejanê şarê xo reyna pare kena û vana, eke ma wina nêzdî bibê ma do hîna bilez dejanê xo sivik bikerê’’